11 мар 2016 13:59Тоҷикистон / Иҷтимоӣ

Мамбеталиев: Ба “милисаи тоҷик” 15 соли ҳабс таҳдид мекунад (ВИДЕО)

Рафик Мамбеталиев, сардори Хадамоти давлатии назорати маводи мухаддири Қирғизистон мегӯяд, ба корманди боздоштшудаи ВКД-и Тоҷикистон бо маводи мухаддир 15 соли зиндон таҳдид мекунад.

Тибқи иттилои Хадамоти давлатии назорати маводи мухаддири Қирғизистон амалиёт алайҳи гуруҳи нашъаҷалобон моҳҳо тарҳрезӣ шуда, як корманди ин ниҳод ба ҳайси харидори тақаллубӣ баромад кардааст: “Дар пайи амалиёт корманди 49-солаи Вазорати умури дохилии Тоҷикистон ва шарики 45-солааш, ки дар гузашта дар мақомоти ҳифзи ҳуқуқ кор кардааст, бо 36 кило маводи нашъадор боздошт шуданд”.

Мақомоти Қирғизистон 4 март навори боздошти ду шаҳрванди Тоҷикистон бо маводи мухаддирро нашр карданд, ки яке аз онҳо майори милиса, корманди Вазорати умури дохилии Тоҷикистон муаррифӣ шуда буд. Дар навор боздоштшудаҳо дар талоши худсафедкунӣ бо ишора ба ҳамдигар изҳор медоранд, ки мошин аз ман нест, аз ӯст.

Тибқи иттилоияи расмии мақомоти Қирғизистон, рӯзи якуми март дар деҳаи Жаштики вилояти Бодканд мошини “Опел вектра”, ки таҳти идораи корманди Вазорати умури дохилии Тоҷикистон қарор дошт, барои санҷиш боздошт гардид: “Дар дохили автомашина инчунин шаҳрванди дигари Тоҷикистон, сокини 45-солаи шаҳри Душанбе қарор дошт. Ҳангоми санҷиш аз дохили автомашина 36 килою 300 грамм ҳашиш дарёфт шуд, ки арзиши он 4 миллион сом (беш аз 400 ҳазор сомонӣ”-ро ташкил медиҳад”.

Дар вокуниш ба ин хабар Вазорати умури дохилии Тоҷикистон изҳорот дод, ки боздоштшуда Муродалӣ Иброҳимов, собиқ корманди мақомоти корҳои дохилӣ мебошад: “Иброҳимов бо фармони Рамазон Раҳимзода, вазири умури дохилии Тоҷикистон аз 9 феврали соли 2016 бинобар "кирдори иснодоваранда, паст задани шаъну шарафи кормандони мақомоти корҳои дохилӣ ва мунтазам вайрон намудани интизоми хизматӣ" аз мақомоти корҳои дохилӣ озод шудааст”.

Мақомоти Қирғизистон мегӯянд, феълан аз рӯи ин ҳодиса парвандаи ҷиноӣ оғоз гардида, тафтишот идома дорад.

Мӯҳр

Хабарҳои монанд: