04 мар 2016 12:25Тоҷикистон / Сиёсат

А.Фелалиев: Журналистон бояд аз ғайриқонунӣ дахолат кардан ба мурофиаи судӣ худдорӣ намоянд

Акрамшо Фелалиев, муовини раиси Маҷлиси намояндагони Тоҷикистон имрӯз, 4 март дар мулоқот бо Девид Кей, гузоришгари вижаи Созмони милалли муттаҳид дар умури ҳифзи ҳуқуқ, озодии андеша ва баён аз вазъи озодии матбуот дар кишвар суҳбат кардааст.

Муҳаммадато Султонов, сухангӯи Маҷлиси намояндагон ба “Озодагон” гуфт, Фелалиев дар ин суҳбат иброз доштааст, “тибқи арзёбии коршиносони байналмилалӣ матбуоти кишвари мо имрӯз дар қиёс бо бисёр кишварҳо аз дидгоҳи озодии баён пешрафта мебошад. Хурсандиовар аст, ки матбуот ба мақсаду мароми халқ ва арзишу манфиатҳои миллӣ наздиктар шудааст”.

Ба иттилои манбаъ, Акрамшо Фелалиев таъкид намуда, ки ҳадафи асосии матбуоти ҳукуматӣ ва мустақил ҳамчун ду шохаи бо ҳам пайвастаи матбуоти Тоҷикистон иҷрои рисолати касбӣ, яъне хизмати содиқона ва софдилона ба манфиати халқу Ватан мебошад: “Тавре, Асосгузори сулҳу ваҳдат-Пешвои миллат, Президенти Ҷумҳурии Тоҷикистон Эмомалӣ Раҳмон дар баромаду суханрониҳояшон борҳо таъкид кардаанд, имрӯз дар фаъолияти матбуоти мустақили Тоҷикистон, яъне дар фаъолияти онҳое, ки худашон рӯзномаву маҷалла, агентии иттилоотӣ, шабакаи телевизион ё радио таъсис дода, кори онро мустақилона пеш мебаранд, унсурҳоеро мебинем, ки сазовори пайравӣ кардану омӯхтан ҳастанд. Муҳим нест, ки рӯзноманигорон дар кадом самт – матбуоти давлатӣ ё матбуоти мустақил фаъолият доранд”.

Муовини раиси Маҷлиси намояндагон афзудааст, рӯзноманигорон бояд аз амалияи ғайриқонунӣ дахолат кардан ба фаъолияти мақомоти тафтишотӣ, мурофиаи судӣ ва монанди онҳо, ки баъзан мушоҳида мегардад, худдорӣ намоянд ва дар риояи муқаррароти қонунгузории мамлакат намуна бошанд: “Парлумони касбии мамлакат дар фаъолияти хеш ҳамеша сухани созандаву пешниҳодҳои судманди хабарнигорони ватаниро ҷонибдорӣ менамояд. Дар сурати ироаи чунин таклифҳои созандаву пешниҳодҳои манфиатовар аз ҷониби васоити ахбори оммаи гуногуни давлативу ғайридавлатӣ, парлумон аз онҳо пуштибонӣ хоҳад кард”.

Манбаъ мегӯяд, Девид Кей, гузоришгари вижаи СММ дар навбати худ гуфта, “хеле шодам, ки Ҳукумати Ҷумҳурии Тоҷикистон ва парлумони касбии мамлакат ба масъалаи ҳифзи ҳуқуқ, озодии андеша ва баён дар Тоҷикистон диққати аввалиндараҷа медиҳанд. Ҳамчунин, дар ҷараёни босуръати пешрафти техникаи муосири иттилоотӣ Тоҷикистон ба рушду такомули воситаҳои ахбори умум ва шабакаҳои техникии иттилоотию телекоммуникатсионии миллии худ ғамхорӣ зоҳир намуда, робитаи Ҳукумати кишвар бо воситаҳои ахбори умум қавитар гардидааст”.

Мӯҳр

Хабарҳои монанд: