22 фев 2016 10:08Тоҷикистон / Иқтисодӣ / Рӯ ба рӯ / Тема дня

6 шикоят аз қаллобиҳо дар Душанбе дар як рӯз: Аз гирифтани пул то мошину хона

Вазорати умури дохилии Тоҷикистон мегӯяд, 21 феврал аз сокинони шаҳри Душанбе 6 шикоят дар мавриди қаллобиҳоро дарёфт кардааст, ки ба додугирифту пул, мошин ва хона рабт доранд.

Ба иттилои манбаъ 21 феврал, аз ҷумла ошкор шудааст, ки ду сокини шаҳри Душанбе, занони 39 ва 69-сола аз боварии зани 38-сола истифода бурда, моҳи декабри соли 2014 хонаи истиқоматиашро дар Душанбе ба маблағи 25000 доллари амрикоӣ ба як марди 43-сола фурӯхтаанд: “Муттаҳамон боздошт шуданд ва муайян гардид, ки онҳо маблағи бадастовардаашонро ба манфиати худ сарф намудаанд”.

Вазорати умури дохилӣ афзуд, ҳамчунин марди 40-сола аз шаҳри Душанбе муроҷиат намудааст, ки моҳи марти соли 2015 марди 45-сола, сокини судшудаи пойтахт барои қаллобӣ, бо роҳи фиреб ба бовариаш даромада, аз ӯ барои фурӯш як адад автомашинаи тамғаи “Тойота-Королла” ва як адад автомашинаи тамғаи “Опел-Астра”, ки арзиши умумиашон 10500 доллари амрикоиро ташкил медиҳад, гирифтааст: “Ин мард мошинҳоро фурӯхта маблағашро ба манфиати худ сарф намудааст”.

Алайҳи ин сокини 45-солаи Душанбе марди 36-солаи дигар низ муроҷиат кардааст, ки моҳи феврали соли 2016 аз ӯ 10000 доллари амрикоӣ гирифта, барнагардонидааст.

Ҷабрдидаи дигар, марди 35-сола ба мақомоти милисаи шаҳри Душанбе муроҷиат карда, арз намудаст, ки моҳи июни соли 2015 марди 38-сола, сокини шаҳри Панҷакент аз ӯ 300 000 рубли русиро гирифта, то ҳол барнагардонидааст: “Бо чунин ариза марди 22-солаи сокини дигари шаҳри Душанбе муроҷиат намудааст, ки моҳи апрели соли 2014 марди 30-солаи сокини Душанбе аз ӯ 52000 доллари амрикоӣ гирифта, барнагардонидааст”.

Барои баргардондани маблағи худ, инчунин ба милиса як зани 27-сола, сокини дигари пойтахт муроҷиат кардааст. Ӯ арз намудааст, ки моҳи апрели соли 2015 зани 29-сола, сокини шаҳри Душанбе ба бовариаш даромада, аз ӯ ҷавоҳироти тиллоӣ ва либос, ҷамъ ба маблағи 6200 доллари амрикоиро гирифта, то ҳол маблағашро барнагардонидааст.

Вазорати умури дохилӣ мегӯяд, феълан аз рӯи ин ҳодисаҳо парвандаҳои ҷиноӣ оғоз гардида, тафтишот идома дорад.

Мӯҳр

Хабарҳои монанд: