15 фев 2016 12:29Тоҷикистон / Сиёсат

Маҷлиси миллӣ исми нави шаҳру навоҳиро тасдиқ мекунад

Маҷлиси миллии Маҷлиси олии Тоҷикистон, палатаи болоии парлумони кишвар дар иҷлосияи навбатии худ пешниҳоди Эмомалӣ Раҳмон, раисиҷумҳури кишвар дар мавриди тағйир додани номи баъзе аз шаҳру навоҳиро баррасӣ хоҳад кард.

Иҷлосияи навбатии Маҷлиси миллӣ 3 марти соли равон дар шаҳри Душанбе баргузор мешавад.

Якуми феврали соли равон Эмомалӣ Раҳмон зери қарорҳои ҳукумат оид ба ба тағйир додани номи як қатор шаҳру ноҳия ва объектҳои ҷуғрофӣ имзо гузошта, онро барои баррасӣ ба Маҷлиси миллии Маҷлиси олӣ пешниҳод карда буд. Бино ба иттилои дафтари матбуоти раисиҷумҳур, тибқи қарорҳои Ҳукумати Тоҷикистон, ки дар асоси пешниҳоди маҷлисҳои вакилони халқи вилоятҳо ва шаҳру ноҳияҳо таҳия шудааст, ноҳияи Ҳисор ба шаҳри Ҳисор тағйир карда, номи чанд ноҳия иваз шудааст. Масалан, Тавилдара - Сангвор, Ҷиргатол - Лахш, Ҷалолиддини Румӣ - Ҷалолиддини Балхӣ, Ҷиликул - Дӯстӣ, Қумсангир - Ҷайҳун, Шӯрообод - Шамсиддини Шоҳин, Ғончӣ - Деваштич шуда, шаҳри Қайроққум - Гулистон ва Чкалов - Бустон номгузорӣ шудаанд. Инчунин обанбори Қайроққум аз ин ба баъд обанбори “Баҳри Тоҷик” ном хоҳад дошт.

“Ҳадаф аз тағйири номи шаҳру ноҳияҳо ва обанбори мазкур амалӣ намудани дархосту пешниҳод ва ормонҳои ватандӯстонаи мардум доир ба барқарор намудани асолати таърихии номҳо, тарғибу ташвиқи анъанаҳои волои миллӣ, ба назар гирфтани хосиятҳои маҳалҳои ҷойгиршавӣ ва мусоидат ба баланд бардоштани ҳисси ифтихору сарфарозии аҳолӣ ва хусусан бедор намудани хотираи таърихии насли ҷавону навраси кишвар аз фарҳангу тамаддуни пурғановати ниёгон ва давлатсозии муосири миллати бостонию созандаи тоҷик аст”,-гуфтааст манбаъ.

Дар ин иҷлосияи Маҷлиси миллӣ ҳамчунин Юсуф Раҳмон, додситони кулли кишвар дар бораи назорати риояи дақиқ ва иҷрои якхелаи қонунҳо дар Тоҷикистон дар соли 2015 гузориш медиҳад.

Мӯҳр

Хабарҳои монанд: