29 дек 2015 10:59Тоҷикистон / Сиёсат / Тема дня

Вакили дифоъ: Саидумар Ҳусайнӣ бо парванда шинос шуд. Худро гунаҳгор намеҳисобад

Саидумар Ҳусайнӣ, муовини аввали раиси ҳизби фаъолияташ дар Тоҷикистон мамнӯи наҳзати исломӣ (ҲНИТ) бо айбномаҳои Додситонии кулл шинос шудааст. Ситора Азизова, вакили дифои оқои Ҳусайнӣ имрӯз, 29 декабр дар суҳбат ба “Озодагон” гуфт, пас аз он ки дар додситонии кулл бо парванда алайҳи зерҳимояаш шинос шуд, ҳамроҳ бо муфатишу роҳбари гуруҳ назди ӯ рафтанд: “Саидумар Ҳусайнӣ пурра бо парванда шинос шуда, зери он имзо гузошт. Ӯ худро гунаҳгор намеҳисобад”.

Хонум Азизова афзуд, дар назар аст додгоҳ давоми як ё ду моҳ парвандаҳоро омӯзад.

Додситонии кулли Тоҷикистон алайҳи Саидумар Ҳусайнӣ, муовини аввали раиси ҳизби фаъолияташ дар Тоҷикистон мамнӯи наҳзати исломӣ (ҲНИТ) бар асоси 14 моддаи Кодекси ҷиноятӣ парванда боз кардааст. Оқои Ҳусайнӣ аз ҷумла дар ташкили иттиҳоди ҷиноӣ, иштирок дар ин иттиҳод, барангехтани кинаю адовати миллӣ, нажодӣ, динӣ ва маҳалгароӣ, даъвати оммавӣ барои бо роҳи зӯроварӣ тағйир додани сохти конститутсионии Тоҷикистон, тахрибкорӣ, тасарруфи силоҳ, лавозимоти ҷангӣ, моддаҳои тарканда ва воситаҳои таркиш муттаҳам мешавад.

Саидумар Ҳусайнӣ ҳамроҳ бо 12 тан аз фаъолони дигари ҲНИТ баъд аз исёни муовини собиқи вазири мудофиа – Абдуҳалим Назарзода ё “Ҳоҷи Ҳалим” боздошт шуд. Додситонии кулли Тоҷикистон аввалҳои моҳи октябри соли равон гуфт, алайҳи дастгиршудаҳо бо иттиҳоми терроризм, ташкили иттиҳоди ҷиноятӣ, барангехтани кинаю адовати миллӣ, нажодӣ, маҳалгароӣ ва ё динӣ, ба таври зӯроварӣ ғасб намудани ҳокимият ё бо зӯроварӣ нигоҳ доштани ҳокимият, даъвати оммавӣ барои бо роҳи зӯроварӣ тағйир додани сохти конститутсионӣ, исёни мусаллаҳона ва чанд моддаи дигари Кодекси ҷиноятӣ парванда боз шудааст.

Мӯҳр

Хабарҳои монанд: