23 дек 2015 15:14Тоҷикистон / Муҳоҷир / Тема дня

Пиразани рус гуфтааст, агар парастори тоҷикаш ихроҷ шавад, ба Тоҷикистон меояд

Пиразани русе баъди он ки парастораш -- шаҳрванди Тоҷикистонро аз Русия депорт карданд, қасд дорад, ба Тоҷикистон биёяд.

Ин хонуми тоҷикистонӣ, ки 42 сол дорад, ба ҳайси парастори як солманди рус дар Челябинск фаъолият мекардааст. Қиссаи ӯро “Комсомольская правда” расонаӣ кард. Бо хоҳиши ин зани тоҷик, нашрия номи ӯро тағйир дода, Шукрона гуфтааст. Шукрона барои иштирок дар маросими дафни писари бузургаш ба Тоҷикистон меояд ва ҳангоми баргаштан дар нуқтаи тафтиши марзбонӣ ҷойи қайди санадҳояш --“Сельскохозяйственная”-ро талаффуз карда натавонистааст. Маъмури марзбонӣ ба ин хулоса мерасад, ки чун ҷои қайдашро намедонад, шояд санадҳояш тақаллубиянд ва ӯро ҷарима мекунанд.

Иттифоқан бори дигар ҳангоми ба Тоҷикистон баргаштан, зан наметавонад номи лангардори кӯчаро ба забон биёрад. Ин навбат ҳам ӯро ҷарима мекунанд ва парвандаи ӯ ба додгоҳ меравад. Додгоҳ қарор мекунад, ки ин зан аз қаламрави Русия ихроҷ шавад. Шукрона дар Русия як писари 15-сола дорад, ки дар мактаб таҳсил мекунад. Дар ин миён Айдар Кучуков, як вакили мудофеъ барои ҳифзи ҳуқуқи ин шаҳрванди Тоҷикистон даст ба кор шудааст. Ӯ ба “Комсомольская правда” гуфтааст, дар сурати депорти модар бар асоси моддаи 19-и “Конвентсия дар бораи ҳуқуқи кӯдак” ҳуқуқи писари ӯ нақз мешавад, зеро ба гуфтаи Кучуков дар ин банд омадааст, “кишварҳои узви ин конвенсия наметавонанд, кӯдакро бе розигии ӯ аз модараш ҷудо кунанд”.

Ба қавли вакили дифоъ, додгоҳ фармони Хадамоти муҳоҷиратро бекор намуд: “Шукрона ва писари ӯ дар Русия мемонанд. Додрас ба меҳнати фоиданоку ҷамъиятӣ машғул будану тарбияи фарзанди ноболиғро бар душ доштани зерҳимояи маро ба назар гирифт”.

Ба иттилои “Комсомольская правда” Шукрона ҳоло парастории пиразани 82-солаи русро идома медиҳад ва дуруст талаффуз кардани ҷойи истиқоматашро тамрин мекунад. Пиразан гуфтааст, дар сурати ба Тоҷикистон депорт шудани Шукрона, ӯ ҳам бо ӯ меравад.

Мӯҳр

Хабарҳои монанд: