16 дек 2015 12:53Тоҷикистон / Дин ва зиндагӣ

Шӯрои уламо эълони пешвои миллатро дар доираи суннат ва Ислом хонд

Шӯрои уламои Маркази исломии Тоҷикистон бо нашри як баёния эълони Эмомалӣ Раҳмон, раисиҷумҳури Тоҷикистонро ба ҳайси пешвои миллат, дар доираи суннат ва дини муҳаммадӣ хондааст.

Шӯрои уламо бо ҳимоят аз қонун «Дар бораи асосгузори сулҳу ваҳдати миллӣ - Пешвои миллат» аз имом-хатибони масоҷид ва кулли муслимини кишвар даъват кардааст, ки онро чун санади волои ҳуқуқӣ ва фарогирандаи беҳтарин суннатҳои маънавии миллати тоҷик бипазиранду дар фаҳмондани муҳтавои он ба мардуми кишвар саҳм гузоранд.

Тибқи ин изҳорот хизматҳои Эмомалӣ Раҳмон аз беҳтарин фарзандони ин марзу бум - Анӯшервону Бузургмеҳр, Низомулмулк, Исмоили Сомонию Абулфазли Балъамӣ дар таҳкими давлатдории миллӣ, эҳёи фарҳанги миллӣ ва дифоъ аз исломи пок заррае кам нест: “Бояд таъкид кард, ки қонуни мазкур бо маънавиёти дини муҳаммадӣ ва рукнҳои муҳими ахлоқи исломӣ комилан мувофиқ аст. Худованди Ғолиби Боҳикмат дар марҳилае ин марди накӯномро ба арсаи сиёсат овард, ки миллат дар остонаи фано буд”.

Уламои Тоҷикистон адолатро муҳимтарин ва бузургтарин сифати раҳбар хондаанд, ки шариати Ислом ба он аз ҳама бештар арҷ мегузорад. Шӯро аз Абдуллоҳ ибни Амр (р) ривоят овардааст, ки Расули Худо (с) фармуданд: «Одилон дар назди Худованд дар минбарҳое аз нур қарор доранд, онон, ки дар ҳукмашон, хонаводаҳояшон ва роҳбарие, ки ба онҳо дода шудааст, адолатро риоя мекунанд».

Дар идома ривоят аз Расули Худо (с)-ро зикр кардаанд, ки фармудааст: «Якрӯза адли подшоҳ аз ибодати шастсолаи як мард беҳтар аст».

Дар охир Шӯрои уламои Маркази исломии Тоҷикистон Эмомалӣ Раҳмон ва мардуми тоҷикистонро бо қабули қонун дар бораи пешвои миллат табрик гуфта, саодати ҳарду ҷаҳонро аз даргоҳи Худованди бузург ба дуо хоҳон аст.

Мӯҳр

Хабарҳои монанд: