Панҷшанбе, 3 Апрел 2025
Афзоиши оби хориҷшаванда аз Сарез ва тамоси Э.Раҳмон бо раисон дар Бадахшон

Мақомоти Бадахшон мегӯянд, дар пайи заминларзаи 7-уми декабр ҳаҷми оби хориҷшаванда аз кӯли Сарез афзоиш ёфтааст.
Ба иттилои манобеи "Озодагон" феълан чораандешӣ барои ба ҷойҳои бехавф кӯчондани аҳолии ҷамоатҳои наздики кӯли Сарез, ки дар пайи заминларза зарар дидаанд, идома дорад: "Кӯчондани аҳолӣ на ба хатари Сарез, балки ба он рабт дорад, ки бисёри сокинон бесарпаноҳ мондаанд ва феълан мошинҳои комиссияи вилоятӣ дар роҳ ба минтақаи осебдида қарор доранд".
Манбаъ таъкид намуд, ки ба далели номусоидии боду ҳаво парвози чархбол ба минтақаи зарардида то ҳол сурат нагирифтааст: "Дар сурати пайдо шудани имкони парвоз тариқи чархбол нахуст маҷруҳону барҷомондагонро аз минтақаи зарардида мекӯчонем. Дар маҷмуъ оилаҳои бесарпаноҳ ба маркази Рӯшон, мактаб-интернатҳои вилоят, литсейи касбӣ-техникии ноҳияи Шуғнон ва дигар ҷойҳо кӯчонда хоҳад шуд, то зимистонро гузаронанд. Дар минтақаи осебдида, феълан барф борида истодааст ва ҳеч имкони бунёди хонаҳо вуҷуд надорад".
Ин дар ҳолест, ки Эмомалӣ Раҳмон, раисиҷумҳури Тоҷикистон имрӯз, 8 декабр бо Шодихон Ҷамшед, раиси Бадахшон ва раисони 8 шаҳру навоҳии вилоят дар робита ба заминларзаи 7-уми декабр суҳбатҳои телефонӣ анҷом додааст.
Тибқи иттилои дафтари матбуоти раисиҷумҳури Тоҷикистон Эмомалӣ Раҳмон ба Шодихон Ҷамшед ва раисони Хоруғ, Мурғоб, Шуғнон, Роштқалъа, Ишкошим, Рӯшон, Ванҷ ва Дарвоз супориш дод, ки аз ҳоли аҳолии осебдида пайваста бохабар бошанд ва барои ба ҷойҳои зисти муваққатӣ кӯчонидан, бо маводи озуқаворию сарулибос ва ёрии тиббӣ таъмин намудани онҳо чораҳои таъхирнопазир андешанд.
Ба иттилои манбаъ Эмомалӣ Раҳмон инчунин ба сарвазири мамлакат Қоҳир Расулзода ва раиси комиссияи ҳукуматӣ Азим Иброҳим дастур дод, ки рафти бартарафсозии оқибатҳои заминларзаро таҳти назорати доимӣ қарор диҳанд.
Раисиҷумҳур таъкид кардааст, ки фавран ситодҳои ҷумҳуриявӣ ва вилоятӣ оид ба кӯмакрасонӣ ба мардуми осебдида таъсис дода шаванд ва дар баробари комиссияи ҳукуматӣ шабурӯз фаъол бошанд.
Мӯҳр
ТАҚВИМ
« Апрел 2025 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | |