11 ноя 2015 16:48Тоҷикистон / Сиёсат / Дидгоҳи хос

Норозигии омбудсмен аз таҳқиқи марги Умаралӣ: Ба Путин гузориш медиҳам...

Павел Астахов, ваколдори ҳуқуқ, ё худ омбудсмени кӯдаки Русия имрӯз, 11 ноябр зимни сафараш ба Санкт Петербург аз макони марги Умаралии 5-моҳа-бемористони ба номи Симбалина боздид кард.

Астахов дар пайи боздид аз ҷои нигоҳдории Умаралӣ, шиносоӣ бо аснод ва амали табибон ба хабарнигорон изҳор дошт, ба касбияти духтурон шубҳае надорад: "“Аммо ба кормандони тиб низ чанд суол аст, ки оё таърихи бемории кӯдакро дархост карданд, чӣ гуна аҳволи кӯдакро ташхис кардаанд. Дар баробари ин тибқи асноде, ки рӯи даст дорем чунин хуруҷи босуръати бемориро ҳатто ҳайати ботаҷрибаи табибон пешгӯӣ карда наметавонист”.

Астахов махсусан амали маъмурини пулисро нисбати Умаралӣ мавриди танқид қарор дод. Ӯ изҳор дошт, ки аз Вазорати умури дохилӣ санҷиши такрории амали маъмурини пулис, ки Умаралиро аз модараш ҷудо карданд, талаб хоҳад намуд: “Худи санади таҳиякардаи маъмурини пулис дар мавриди Умаралӣ, ки “дарёфти кӯдаки партофташуда ё раҳгумгашта” ном дорад, баҳсбарангез аст. Чӣ гуна маъмури пулис ин санадро таҳия кардааст, чун кӯдак бо санад дар бораи таваллуд оварда шуда буд”.

Ӯ афзуд, ки худи имрӯз ба вазири умури дохилии Русия муроҷиат карда, санҷиши такрориро дархост хоҳад кард, “чун тибқи баҳогузории ман санҷиши гузарондашуда муфассал ва амиқ набуд. Инчунин зарур медонам, ки чунин санҷишҳо ба назорати прокуратура ниёз доранд”.

Омбудсмени кӯдаки Русия инчунин суол гузоштааст, ки чӣ зарурат буд, то модари кӯдакро фавран ба суд кашола кунанд, то дар ҳаҷми 5 ҳазор рубл ҷарима банданд? Ӯ илова намудааст, ки аз ин қазия ба Владимир Путин, раисиҷумҳури Русия ва Дмитрий Медведев, сарвазири ин кишвар гузориш хоҳад навишт.

Астахов инчунин ба волидони Умаралӣ маслиҳат додааст, ки ба додгоҳ муроҷиат кунанд, то муайян шавад, ки то куҷо амали маъмурини пулис қонунӣ буд. Асоси муроҷиат ба додгоҳро Астахов санади тартибдодаи пулис дар мавриди дарёфти кӯдаки партофташуда арзёбӣ кардааст, ки дар илова ба он шаҳодатномаи таваллудро низ зам кардаанд.

Қаблан ВКД-и Русия эълон кард, ки дар муносибати кормандонаш бо Умаралӣ ва волидонаш қонуншиканиеро ошкор накард. Тибқи хулосаи ташхиси тиббӣ, ки 7 ноябр эълон гардид, Умаралӣ бар асари иммунитети заиф ва таъсири ситомегалавирус даргузаштааст.

Марги мармузи Умар Назарови 5-моҳа, ки баъди гирифтан аз дасти волидон шаби 13 ба 14 октябр дар беморхонаи Симбалина даргузаштааст, дар ҷомеа вокуниши шадид ба вуҷуд овард. Мақомоти Русия мегӯянд, феълан аз рӯи ин ҳодиса парванда оғоз шуда, тафтишот идома дорад.

Мӯҳр

Хабарҳои монанд:

Андешаманд

Сад сол гузарад ҳам ин русҳо ба гапашон меистанд ва ҳатто падару модари Умаралиро гунаҳгор карда, ба паси панҷара ҳам бурданашон мукин. Онҳо ҳатто Шоираи дар див. 201 аз тарафи афсари рус кушташударо ҳам гунаҳгор хоҳанд кард. ки ӯ худаш ба афсар ҳуҷум карду Шербаков барои ҳимояи марзу буми Тоҷикистон аз дасти ин зани террорист моро ҳимоя намуд. Шояд орден ҳам талаб кунад

Ҷавоб диҳед Иқтибос Шикоят

Эзоҳ илова кунед