02 ноя 2015 17:49Тоҷикистон / Иқтисодӣ / Акс

Мусофир: Умедворам нархҳои арзони “Сомон Эйр” боло намераванд (АКС)

Ширкати ҳавопаймоии «Сомон Эйр» хатсайри нави худро аз Душанбе ба Бишкек оғоз намуд, ки арзиши чиптаи рафтуомад назар ба дигар ширкатҳои ҳавопаймоӣ 77 фоиз арзон мебошад. «Сомон Эйр» аввалин парвози худро ба хатсайри Душанбе-Бишкек рӯзи ҷумъа 30 октябр соати 19:40 ва Бишкек-Душанберо соати 1:00 бо вақти маҳалӣ ба анҷом расонид.

Дар фурудгоҳи байналмиллалии Душанбе ширкати мазкур мусофиронро бо сертификати “Мусофири аввалин” ва туҳфаҳо пешвоз гирифт. Тимур Бандишоев, сухангуи ширкати ҳавопаймоии «Сомон Эйр» дар суҳбат бо хабарнигори “Озодагон” гуфт, ки арзиши чипта дар як самт 545 сомонӣ ва рафту омад 760 сомонӣ мебошад. “Хатсайр ҳам барои ширкат ва ҳам барои мусофирон муфид мебошад. Ин нарх инчунин барои донишҷӯёне, ки дар Тоҷикистон ва Қирғизистон таҳсил мекунанд, пешбинӣ шудааст. Тавассути ин хатсайр мо на танҳо шаҳрвандони Тоҷикистон, балки шаҳрвандони Қирғизистонро низ метавонем ҷалб кунем. Барои онҳо мо як пешниҳоди муфидро омода кардем. Яъне тавассути хатсайри Бишкек-Душанбе, ки соати 1:20 ҳар рӯзи шанбе парвоз мекунад, мусофирон метавонанд бо нархи муфид пас аз як соат ба Франкфурт парвоз кунанд”-гуфт Тимур Бандишоев.

Дар ҳамин ҳол Зуҳро Қурбонова мусофири хатсайри нави «Сомон Эйр» дар суҳбат бо мо гуфт, ки аз нуқтаи чиптафурушӣ барои рафтуомад бо арзиши 790 сомонӣ чипта харидааст: “Умедворам чунин нарх дар оянда низ мемонад. Чун тариқи дигар ширкатҳо барои сафар ба Бишкек як баробар зиёд сарф мекардем”.

Тибқи иттилои “Сомон Эйр” парвозҳо дар хатсайри Душанбе - пойтахти Қирғизистон ҳафтае 2 маротиба, рӯзҳои ҷумъа ва якшанбе амалӣ мешаванд. Парвозҳои бозпас шаби шанбе ва душанбе амалӣ мегарданд.

Феълан ширкати ҳавопаймоии «Сомон Эйр» парвозҳоро аз Тоҷикистон ба самтҳои Олмон, АМА, Туркия, Хитой, Русия ва Қазоқистон муваффақона иҷро мекунад. Пойгоҳи ширкати ҳавопаймоӣ аз ҳавопаймоҳои Боинг 737-300, -800 ва -900 иборат мебошад.