23 окт 2015 15:26Тоҷикистон / Дидгоҳи хос

Даъвати Абдулқодирзода барои берун шудан аз узвияти ҲНИТ

Сайидмукаррам Абдулқодирзода, раиси Шӯрои уламои Маркази исломии Тоҷикистон бесарусомонӣ ва ҷангҳои олами Исломро ба ҳизбу гуруҳбозиҳо марбут донист.

Абдулқодирзода имрӯз, 23 октябр дар хутбаи намози ҷумъа дар Масҷиди марказӣ изҳор дошт, “аз замоне ки ҳизбтаъсисдиҳиву фирқаву гуруҳбозиҳо сар шуд, мусалмонон ноком ва душманони Ислом барои зарба задан даст пайдо карданд. Бо дасти мусалмон мусалмон мекушанд”.

Ба иддаои муфтии Тоҷикистон, ҳар куҷое, ки мусалмон кушта шавад, аз дасти мусалмон аст, чӣ дар Афғонистон, чӣ дар Ироқ ва чӣ Сурия. Ба таъкиди вай, “дар ҳеч куҷое аскари ғайримусалмон мусалмон накушта истодааст”.

Сайидмукаррам Абдулқодирзода дар идома аз Ҳизби таҳрир ва равияи Салафия мисол зада гуфт, мардуми мусалмон шомили онҳо шуда, ба муқобили якдигар теғ мекашанд. “Дур намеравем, дар ҳамин сафи намоз агар салафие ё аз дигар гуруҳе бошад, ҳам дар рафти намоз, ҳам дар нигоҳу муносибаташ дар дохили масҷид як озоре ба намозгузорон мерасонад. Ҷои пушидааш нест, ошкору равшан ҳаммаи мо ҳаррӯз мебинем, ки дар вақти илтиҷо, даст бардоштан аз болои мадум хез мегираду меравад, ки озори мусалмон аст”,-афзуд раиси Шӯрои уламо.

Абдулқодирзода дар охир аз мардуми кишвар, ба вижа ҷавонон хоҳиш намуд, агар “нофаҳмидаву содалавҳона хато карда”, ба Ҳизби наҳзати исломии Тоҷикистон аъзо шуда бошанд, бо ихтиёри худ аз узвияти он даст кашида, билетҳои хешро ба мақомоти қудратӣ биспоранд. Дар ин сурат ба гуфтаи ӯ, “аз тамоми ҷавобгарӣ наҷот меёбанд ва илло чи тавре, ки мову шумо хуб медонем, Суди олӣ ин ҳизбро ҳамчун ҳизби террористӣ эълон кардааст”.

Мӯҳр

Хабарҳои монанд: