20 окт 2015 09:42Оcиёи Марказӣ / Тоҷикистон

Президент маслиҳати Кумитаи фавқулодаро гӯш накард

Эмомалӣ Раҳмон, раисиҷумҳури Тоҷикистон ба воситаи роҳи мошингард дар барфу борон 700 километрро аз Душанбе то навоҳии Суғд тай карда, дар қисмате аз ин роҳ шахсан пушти чанбари мошин нишастааст.

Тавре дафтари матбуоти раисиҷумҳури Тоҷикистон шоми 19 октябр иттилоъ дод, Эмомалӣ Раҳмон бевосита бо ҳолати роҳҳои мошингарди аҳамияти маҳаллӣ, ҷумҳуриявӣ ва байналмилалии ҳудуди шаҳру ноҳияҳои Варзоб, Айнӣ, Панҷакент, Шаҳристон, Истаравшан, Ғончӣ, Спитамен, Ҷаббор Расулов, Чкаловск, Хуҷанд, Бобоҷон Ғафуров ва Қайроқум шинос шуд: “Аз ҷумла, дар як қитъаи роҳи мошингарди навбунёди Айнӣ-Панҷакент президенти мамлакат шахсан пушти чанбари мошин нишаста, сифати ин роҳро аз назар гузаронида, ба самараи кори роҳсозони тоҷику чинӣ баҳои баланд дод”.

Ба иттилои манбаъ, Эмомалӣ Раҳмон зикр кардааст, ки камбудиҳои ҷузъӣ дар роҳи Айнӣ-Панҷакент вуҷуд доранд, вале азбаски муҳлати сохтмони ин роҳ ҳоло анҷом наёфтааст, изҳори бовар кардааст, ҳамаи нуқсонҳои ҷойдошта бартараф мегарданд: “Ҳамчунин, Эмомалӣ Раҳмон зимни сафари худ ба вилояти Суғд аз нақбҳои «Истиқлол» ва «Шаҳристон» убур карда, ба сифати корҳое, ки барои такмили пурраи нақби мошингарди «Истиқлол» идома дорад, баҳои баланд дод”.

Дафтари матбуоти раисиҷумҳур таъкид мекунад, ки сафари Эмомалӣ Раҳмон тариқи роҳи мошингард ба Суғд дар ҳоле сурат гирифт, ки минтақаро боришоти барфу борон фаро гирифта буд.

Ин дар ҳолест, ки қаблан Кумитаи ҳолатҳои фавқулодаи Тоҷикистон бо пахши як эълон аз тоҷикистониёну меҳмонон даъват намуд, ки ба далели номусоидии боду ҳаво нимаи дуюми моҳи октябр аз сафар ба навоҳии осебпазир, аз ҷумла кӯҳу саҳро худдорӣ кунанд.

Мӯҳр

Хабарҳои монанд: