08 окт 2015 10:49Тоҷикистон / Сиёсат / Рӯ ба рӯ

Ҷамшед Ёров: Мо ҳизбро не, одамонро ҳимоя мекунем

Вакили дифои Маҳмадалӣ Ҳайит, муовини раҳбари Ҳизби наҳзати исломии Тоҷикистон, ки Додгоҳи олӣ фаъолияташро манъ кард, мегӯяд, наметавонад бо зерҳимояаш дидор кунад. Ҷамшед Ёров мегӯяд, қасд дорад имрӯз, 8 октябр дар ин робита ба Додгоҳи олӣ шикоят бубарад.

Оқои Ёров дар суҳбат ба “Озодагон” гуфт, тайи як ҳафтаи ахир талошҳояш барои дидор бо Маҳмадалӣ Ҳайит бенатиҷаанд: “Барои вохӯрӣ бо зерҳимояам чанд маротиба муроҷиат кардам, аммо посухе намегирам. Муфаттиш мегӯяд, ман як муфаттиши оддӣ ҳастам, ба сардор нависед”.

Ҷамшед Ёров мегӯяд, шикоятҳояш ба Прокуратураи генералӣ ва муфаттишони ин ниҳод ҳам бенатиҷа будаанд. Ӯ афзуд, мақомот бояд дарк кунанд, ки вакили дифоъ на аз ҳуқуқҳои ҲНИТ, балки аз ҳуқуқҳои шаҳрвандон ҳимоя мекунанд: “Мо ҳизбро не, балки одамонро ҳимоя мекунем”.

Дар ҳамин ҳол, Савринисо Ҷӯрабекова, ҳамсари Маҳмадалӣ Ҳайит ҳам мегӯяд, мебоист рӯзҳои 6 ё 7 октябр иҷозаи дидор бо шавҳарашро дарёфт мекард, аммо ин иттифоқ сурат нагирифт: “Ду рӯз аст, ки занги муфаттишро интизорем. Ӯ ваъда кард, ба вакил иҷозаи ба назди шавҳарам даромаданро медиҳад, вале бо ҳар баҳона иҷоза намедиҳад”.

Хонум Ҷӯрабекова иброз медорад, ҳафтае 3 маротиба барои шавҳараш хӯрок мебарад: “Кормандони СИЗО-и КДАМ ғизоро бурда, аз он тараф варақае бо навиштаҷоти “раҳмат, гирифтам” меоранд”.

Дар пайи анҷоми амалиёт алайҳи Абдуҳалим Назарзода беш аш 20 тан аз аъзои Раёсати олии ҲНИТ боздошт шуданд. Додситонии кулли Тоҷикистон гуфт, онҳо дар ҳамдастӣ бо Ҳоҷӣ Ҳалим муттаҳам мешаванд. Вакили дифоъ Бузургмеҳр Ёров ба дунболи боздошти аъзои ҲНИТ эълон кард, барои ҳимоя аз онҳо Кумитаи вижаеро таъсис медиҳад, аммо баъдан худаш аз сӯи кормандони пулис бо иттиҳоми қаллобӣ ва сохтакории ҳуҷҷат боздошт гардид. Наздикони аъзои боздоштшудаи ҲНИТ мегӯянд бо дастгир шудани Ёров касе ба онҳо дар бораи ҳолу аҳволи пайвандонашон хабар намедиҳад. Ҳамсари Ҳикматулло Сайфуллозода мегӯяд, намедонад ҳоло шавҳараш чи вазъе дорад. Ӯ меафзояд, бо далели надоштани маблағ натавонист вакили дифоъ бигирад: “Чанд рӯз аст, аз мағоза қарз гирифта истодаам, шароити зиндагиям хеле бад мебошад”.

Мӯҳр

Хабарҳои монанд: