02 сен 2015 15:25Тоҷикистон / Сиёсат

Э.Раҳмон ба Ҷинпин: Чин иттифоқчии боэътимод, шарики иқтисодӣ ва ҳамсояи неки мо боқӣ мемонад

Эмомалӣ Раҳмон, раисиҷумҳури Тоҷикистон имрӯз, 2 сентябр дар доираи сафараш ба Чин, бо Син Ҷинпин, раисиҷумҳури ин кишвар мулоқот кардааст.

Тибқи иттилои дафтари матбуоти раисиҷумҳури кишвар, Син Ҷинпин дар суҳбат ба Эмомалӣ Раҳмон гуфтааст, кишвараш ба Тоҷикистон дар амалӣ намудани лоиҳаи бузурги “бунёди камарбанди иқтисодии Шоҳроҳи Абрешим” мусоидат хоҳад кард.

Ба иттилои манбаъ, Син Ҷинпин қайд намудааст, ки Чин барои навсозии пурраи роҳи мошингарди Душанбе-Кӯлоб-Хоруғ-Кулма-Қароқуруму ҳамоҳангсозии панҷҷониба ва сохтмони роҳи оҳани Чин-Қирғизистон-Тоҷикистон-Афғонистон-Эрон тадбирҳои зарурӣ амалӣ менамояд.

Манбаъ мегӯяд, дар ин мулоқт се санади ҳамкорӣ миёни Тоҷикистон ва Чин ба имзо расидааст: ”Ёддошти тафоҳум байни Ҳукумати Ҷумҳурии Тоҷикистон ва Ҳукумати Ҷумҳурии Мардумии Чин оид ба таҳияи Барномаи чаҳорчубавии ҳамкорӣ; Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Мардумии Чин оид ба ҳамкорӣ дар соҳаи техникӣ-иқтисодӣ; Барномаи табодули фарҳангӣ байни Вазорати фарҳанги Ҷумҳурии Тоҷикистон ва Вазорати фарҳанги Ҷумҳурии Мардумии Чин”.

Дафтари матбуоти раисиҷумҳур мегӯяд, худи ҳамин рӯз дар шаҳри Чин дар ҳузури Эмомалӣ Раҳмон боз ду санади дигар - Созишнома байни Бонки давлатии амонатгузории Тоҷикистон -- Амонатбонк ва Бонки рушди Хитой ва Созишномаи ҳамкории вилояти Хатлони Тоҷикистон ва музофоти Хэнани Чин доир ба сохтмони комплекси агросаноатӣ ба имзо расид.

Эмомалӣ Раҳмон аз ҳамтои чинияш барои даъват ҷиҳати ширкат дар тантанаҳои идонаи 70-солагии Ҷанги дуюми ҷаҳонӣ изҳори сипос карда, аз имкони мусоид барои мулоқоту музокирот ба хотири рушди муносибатҳои дӯсттона ва ҳамкорӣ дар бахшҳои гуногун ибрози қаноатмандӣ кардааст. Эмомалӣ Раҳмон гуфтааст, барои Тоҷикистон Чин иттифоқчии боэътимод ва шарики иқтисодӣ, дӯст ва ҳамсояи нек боқӣ мемонад: “Мо барои таъмиқу тавсеаи ҳамкорӣ бо Чин дар ҳама ҷанбаҳо, ҳам дар доираи муносибатҳои дуҷониба ва ҳам дар чаҳорчуби дигар ташкилоту созмонҳои бонуфуз дар арсаи ҷаҳонӣ мавқеи ҳамсон дорем”.

Дафтари матбуоти раисиҷумҳур мегӯяд, дар ин мулоқот, рушди муносибатҳои ҳамкорӣ дар доираи Созмони Ҳамкории Шанхай, афзоиши ҳаҷми гардиши мол миёни ду кишвар, тақвияти муносибатҳои тиҷоратӣ-иқтисодӣ, мусоидати Чин ба рушди бахши энергетикии Тоҷикистон ва афзалият додан ба ҳамкории байниминтақавӣ аз масъалаҳои муҳими будааст.

Манбаъ мегӯяд, Син Ҷинпин ба Эмомалӣ Раҳмон барои қабули даъват ва иродаи иштирок дар паради ҳарбӣ дар шаҳри Пекин ба ифтихори 70-солагии анҷоми Ҷанги дуюми ҷаҳонӣ изҳори миннатдорӣ карда, мулоқоти имрӯзаро як имкони муҳим ва мусоид барои муҳокимаи муносибатҳои дӯстию ҳамкорӣ, инчунин дарёфти роҳҳи нави баҳрабардорӣ аз имкониятҳои мавҷуда арзёбӣ кардааст. Номбурда иброз доштааст, ки ҳукумати Чин минбаъд низ барои пешрафти Тоҷикистони ҳамсоя саъю талош меварзад: “Аз ҷумла зикр гардид, ки ҷониби Чин кӯшиш ба харҷ медиҳад то бунёди камарбанди иқтисодии Шоҳроҳи Абрешим бо татбиқи 3 ҳадафи стратегии Тоҷикистон - таъмини истиқлолияти энергетикӣ, раҳоӣ аз бунбасти коммуникатсионӣ ва амнияти озуқаворӣ - ҳамоҳангу ҳамқадам бошад”.

Син Ҷинпин ҳамчунин ба меваи хушки Тоҷикистон таваҷҷуҳи хос зоҳир намуда, изҳори бовар намуд, ки ба ин ва дигар маҳсулоти Тоҷикистон дар бозорҳои Чин майдони фарох боз мегардад. Раисиҷумҳури Чин изҳор доштааст, ки кишвараш ба созмон додани минтақаи озоди иқтисодии Чин ва Тоҷикистон омода аст.

Ба иттилои манбаъ, дар мулоқот масъалаи таъмини амнияти минтақа, ҳамкорӣ барои пурзӯр кардани назорат дар сарҳади давлатии Тоҷикистон бо Афғонистон ва андешидани чораҳои муштарак оид ба коҳиш додани таъсири манфии бӯҳрони молиявию иқтисодии ҷаҳонӣ баррасӣ шудааст.

Мӯҳр

Хабарҳои монанд: