28 авг 2015 16:10Тоҷикистон / CV / Иҷтимоӣ / Тема дня

Баҳсҳо дар бораи Равшан: Агар президент мебуд, Қримро бармегардонд

Садоқати як муҳоҷири тоҷик, ки бо вуҷуди мушкилоти сахти иқтисодию қарзҳояш аз бонк наздик ба як миллион рубли ёфтаи худро ба соҳибаш баргардонд, корбаронони шабакаҳои иҷтимоиро ба ваҷд овардааст.

Аксари корбарон амали муҳоҷири тоҷикро қаҳрамонӣ хонда, гуфтаанд, бо ин кораш собит сохт, ҳанӯз садоқат вуҷуд дорад. Лидия Гарнова, як фаъоли Фейсбук навиштааст, “дар ин дунё ҳоло ҳам мардуми шариф ба сар мебурдаанд”. “Boldbaatar Ugmed”, як корбари муғул гуфтааст, “боварам намеояд, ки ҳанӯз ҳам чизе бо номи садоқат вуҷуд доштааст”.

Юрий Биченок, корбари дигари рус амали муҳоҷири тоҷикро аз зумраи ҳодисаҳои нодири олами кунунӣ хонда, афзудааст, “ҳарчанд ин ҳодиса миёни миллионҳо якест, вале баҳонае барои хушбин будан метавонад бошад”. Юрий Куриленко низ ба ин баҳс ворид шуда, бо ибрози таассуф навиштааст: “Агар ин мард президенти Русия мебуд, ҳатман Қрими “дӯздӣ”-ро дубора ба Украина бармегардонд”.

Номи ин муҳоҷири 47-сола аз Тоҷикистон, ки ба ронандагӣ машғул будааст, замоне сархати расонаҳои хабарии Русия қарор гирифт, ки ҷузвдон ва 850 ҳазору 200 рубли фаромушшудаи як мусофири худро ба соҳибаш баргардонд. Ин 850 рубл марбут ба сокини ношунавои маҳаллие будааст, ки “мототсикл”-и худро фурӯхтаву ҳангоми бозгашт ба хона ҷузвдони маблағро дохили нақлиёти мусофирбар фаромӯш кардааст.

Муҳоҷири тоҷик, ки аз ӯ Равшан ном бурдаанд, гуфтааст, “ҳар шаб баъд аз соати корӣ дохили нақлиётро аз назар мегузаронам, то мусофире чизеро фаромӯш накарда бошад ва он шаб низ ин амалро такрор кардам, ки ҷузвдонеро бо 850 ҳазору 200 рубл ва либосе ёфтам. Пагоҳ аз субҳ то шом ин ҷузвдонро бо худ гирифтам, ки шояд касе ба суроғаш ояд. Аммо касе наомад”.

Ба гуфтаи Равшан, ӯ аз тариқи нишони навиштаи пушти лифофаи маблағ муштарии “Мототсикл”-ро пайдо карда, тавассути он бо соҳиби маблағ тамос гирифтааст: “Дар он нишонӣ мардеро ёфтам, ки гуфт, ман бо ин маблағ “мототсикл” харидаам ва ҳоло он дигар моли ман нест ва шумораеро доду гуфт, метавонӣ соҳиби маблағро бо ин пайдо кунӣ”.

Ин ҳама шарҳу истиқбол аз амали як муҳоҷири кории тоҷик дар Русия дар ҳолест, ки шабакаи телевизионии “НТВ” бо пахши гузорише ин ҳодисаро пӯшиш дода, аз зикри шаҳрвандии ин муҳоҷири тоҷик худдорӣ кард.

Таҳиягарони гузориши “НТВ” ин амали муҳоҷири тоҷикро, ки дар Русия ба ҳайси ронандаи мусфирбар кор мекунад, қобили таҳсин хонда, аммо нагуфтаанд, ин марди 47-сола ҳам аз зумраи беш аз 2 миллион муҳоҷири кории Тоҷикистон аст, ки ҳамасола сари садҳо тани онҳо бо дасти миллатгароёни рус бидуни асос дар Русия аз тан ҷудо мешавад.

Ин амали масъулини шабакаи телевизионии “НТВ” бо вокуниши бархе аз бинандагон ва корбарони торнамои ин шабака ҳам рӯбарӯ шудааст. Камил Денишев, корбари торнамои “НТВ” навиштааст, “аз рафтору кирдори ронандагони қафқозӣ ҳар лаҳза хабар медиҳанду мегӯянд, ин корро кард ё он амалро анҷом дод. Аммо дар ин гуна ҳолатҳо намегӯянд, ин мард ҳам аз Қафқоз ё Осиёи Марказӣ аст. Ба ҳар сурат, Офаринаш!”

Зикр нашудани табаияти муҳоҷири тоҷик дар ҳолест, ки ҳангоми содир шудани ҷиноят аз сӯи шаҳрвандони Тоҷикистон расонаҳои русӣ ҳатман ба миллат ва шаҳрвандии ӯ ишора мекунанд. Ҳатто ҳолатҳое низ шуда, ки дар ВАО-и Русия шаҳрвандони дигар кишварҳои Осиёи Марказӣ, к ибо иттиҳоми ҷиноят боздошт шудаанд, тоҷик муаррифӣ мешавад.

Мӯҳр

Хабарҳои монанд:

Душанбеги

Ахсан, бародари гироми Равшан! Хамин рафторатон садхо маърузаю нашрияхоро оид ба баланд бардоштани обруи (имичи) точикон иваз кард.

Ҷавоб диҳед Иқтибос Шикоят

ахсан ба акаи Равшан

Дар хакикат шохид хастем, ки имрузхо аксари расонахои хабарии русия дар бораи икдоми акаи Равшан сухан меронанд. Боиси ифтихори тамоми точикон аст. Дар хакикат бо ин рафторатон як бори дигар нишон додед, ки мардуми точик чи гуна хоксору каноатпеша хастанд. Ин амали он кадар бузург хам набошад, аз ин пас ба точикон хамин гуна бахо медиханд.

Ҷавоб диҳед Иқтибос Шикоят

Мухаммад

хаминашро хуби хуб медонам ки агар ин одам арман,гурчи,рус,каззок ё узбак мешуд сару садояш зиёдтар мешуд

Ҷавоб диҳед Иқтибос Шикоят

Эзоҳ илова кунед