27 авг 2015 12:11Тоҷикистон / CV / Сиёсат / Рӯ ба рӯ / Тема дня

Сипоси Барак Обама аз раҳбарият ва мардуми Тоҷикистон

Эмомалӣ Раҳмон, раиси ҷумҳурии Тоҷикистон Ллойд Остин III – фармондеҳи Фармондеҳии марказии Иёлоти Муттаҳидаи Амрикоро, ки дар доираи як сафари корӣ дар шаҳри Душанбе қарор дорад, ба ҳузур пазируфтааст.

Тибқи иттилои дафтари матбуоти раёсатҷумҳур, адр мулоқот масоили ҳамкории гуногунҷанбаи Тоҷикистону Амрико, пеш аз ҳама дар соҳаҳои мудофиа ва амнияти минтақавӣ баррасӣ шудааст.

Эмомалӣ Раҳмон дар суҳбат бо генерали амрикоӣ гуфтааст,”имрӯз рӯзномаи дуҷонибаи байнидавлатии Тоҷикистону Амрико масъалаҳои гуногунро фаро мегирад, вале дар миёни онҳо мавзӯъҳои гуногуни марбут ба таъмини сулҳу субот дар минтақаи мо ҷойгоҳи хоса доранд, зеро онҳо дорои иртиботи қавӣ бо вазъи Афғонистон мебошанд”.

Ллойд Остин III ба саҳми Тоҷикистон дар таъмини амну субот дар минтақаи Осиёи Марказӣ ва мусоидати он ба неруҳои байналмилалии посдори сулҳ дар Афғонистон баҳои баланд дода, аз номи роҳбарияти кишвари Амрико ба Эмомалӣ Раҳмон ва мардуми Тоҷикистон арзи сипос намудааст.

ӯ таъкид кардааст, Тоҷикистон бо мавқеи калидии худ дар минтақа ва марзи тӯлонияш бо Афғонистон дар саргаҳи пешгирӣ дар доманаи паҳншавии терроризму ифротгароӣ, гардиши ғайриқонунии маводи мухаддир ва дигар хатарҳои ҷиддӣ қарор дорад: “Генерал бори дигар мавқеи устувори Амрикоро дар роҳи дастгирии пайваста аз ҷаҳду талоши Тоҷикистон барои ҳифз ва таҳкими суботи иҷтимоию сиёсӣ, таъмини рушди иқтисодӣ ва густариши ҳамкории босамари минтақавӣ дар Осиёи Марказӣ таъкид доштааст”.

Дар мулоқот инчунин доир ба ҳолати кунунӣ ва дурнамои авзоъ дар минтақаҳои доғи Ховари Миёна, андешидани чораҳои муштараки пешгирикунанда аз таҳдиду хатарҳои ҷаҳони муосир ва дигар мавзӯъҳои мавриди таваҷҷуҳ гуфтугӯй сурат гирифт.

Мӯҳр

Хабарҳои монанд: