26 авг 2015 12:42Тоҷикистон / Сиёсат / Тема дня

Мансабдори афғон: Ҳадафи “Камондуҳои исломӣ” ноамнсозии Осиёи Марказист

Ҳадафи “Камондуҳои исломӣ”, як гуруҳи ҳаросафкани навзуҳур дар Афғонистон ноамнсозии кишварҳои Осиёи Марказӣ мебошад. Ин нуктаро Муҳаммадалӣ Аҳмадӣ, муовини волии вилояти Ғазнӣ дар суҳбат бо хабаргузории “Форс” иброз доштааст.

Ин мақоми вилояти Ғазнии Афғонистон гуфтааст, омори куллии ин афрод байни 500 то ҳазор нафар бароварда мешавад ва миёни онҳо занону кӯдкони Осиёи Марказӣ, ки бо ангезаи ҷанг омадаанд, дида мешавад. Ба қавли оқои Аҳмадӣ, ин гуруҳи навзуҳур бо роҳбурди ҷанги қавӣ вориди хоки Афғонистон шудаанд. Ба иддаои ӯ, бахши бузурге аз ин афрод, ки дар шимол рафта ва бахши дигаре, ки дар вилоятҳои ҷануб лона гузоштаанд бо як идеология ва ҳадаф дар ҳоли фаъолият ҳастанд. Муовини волии вилояти Ғазнӣ гуфта, “акнун шибҳинизомиёни вилоятҳои шимолӣ аксаран аз тариқи ин афрод таҷҳиз ва ҳимоят мешаванд".

Муҳаммадалӣ Аҳмадӣ афзуда, ин афрод намехоҳанд таҳти фишорҳои байналмилалӣ қарор бигиранд: “Ба ҳамин далел барчаспи “Камондуҳои исломӣ”-ро ба худ зада ва талош доранд, то дар ростои таҳақуқи аҳдофи "Ал-Қоида" ва "ДИИШ" фаъолиятҳои худро идома диҳанд”.

Бар бунёди суханони муовини волии Ғазнӣ, “Командуҳои исломӣ” ҳаммонанди бузургтарин гуруҳҳои террористӣ ояндаи хатарнок доранд. Ӯ таъкид кардааст, бар асоси оморҳо ва гуфтугуҳои мардуми манотиқе, ки ин афрод онҷо ҳузур доранд, ин шибҳинизомиён пешмаргаҳои ДИИШ мебошанд. Аҳмадӣ инчунин изҳор доштааст, бо далели ин, ки ДИИШ таҳти фишорҳои байналмилалӣ қарор гирифта, номи худро тағйир дода ва мӯътадилтар аз ДИИШ бо роҳбурди ҷангии мушаххасе дар ҳоли фаъолият ҳастанд.

Дар мавриди зуҳури гуруҳе бо номи “Камондуҳои исломӣ” расонаҳои Афғонистон чанд рӯз қабл хабар дода гуфтанд, дар вилоятҳои Ғазнӣ, Бадахшон, Қундуз ва Форёб, Зобул, Қандаҳор ва Урузгон фаъол ҳастанд.

Мӯҳр

Хабарҳои монанд: