17 авг 2015 13:27Тоҷикистон / CV / Иҷтимоӣ

Бино ва корхонаҳое, ки Убайдуллоев то 9 сентябр ифтитоҳ мекунад

Шаҳрдории Душанбе мегӯяд, бахшида ба 24-солагии истиқлолияти давлатӣ дар пойтахти кишвар як қатор биноҳои нави истиқоматӣ ва корхонаҳои истеҳсолие ифтитоҳ хоҳанд шуд, ки беш аз ҳазору 200 нафарро бо ҷои кори доимӣ таъмин мекунанд.

Шавкат Саидов, сухангӯи шаҳрдори Душанбе рӯзи 17 август дар суҳбат бо “Озодагон” гуфт, ин корхонаву биноҳои баландошёнаи истиқоматӣ аз ҳисоби сарчашмаҳои молиявии буҷетӣ ва субъектҳои соҳибкорӣ бунёд ва ифтитоҳ хоҳанд шуд.

Ба қавли ӯ, то 9 сентябри соли равон дар пойтахт, ҶДММ “ПЭТ полиэтил-тестилат проформ” оид ба истеҳсоли зарфҳои пластикӣ ва обҳои минералӣ ва нӯшокӣ бо иқтидори истеҳсоли 18 ҳазор зарфи пластикӣ ва 20 ҳазор литр нӯшокӣ дар як соат ифтитоҳ хоҳад шуд, ки 600 нафарро бо ҷойи кори доимӣ таъмин мекунад.

Инчунин, сехи дӯзандагӣ дар заминаи ҶДММ Иттиҳодияи истеҳсолии “Нассоҷии тоҷик” оид ба истеҳсоли сару либоси мактабӣ бо иқтидори 24 ҳазор дона костюми писарона ва 60 ҳазор дона либоси духтарона дар як сол бо ҷалби 270 коргар ифтитоҳ шуда, "ҶДММ “Грин-Фудс” оид ба истеҳсоли нон, макарон, рехтани равғани растанӣ ба зарфҳои пластикӣ бо иқтидори истеҳсоли 3 тонна нон, 24 тонна макарон ва 6 ҳазор литр равғани растанӣ дар як шабонарӯз бо ҷалби 100 коргар ба кор хоҳад даромаду “ҶДММ “Ҳалима-2015” бо иқтидори истеҳсоли 25 ҳазор баста рӯҷои хоб ва 10 ҳазор хилъати тиббӣ дар як моҳ бо 100 коргар ба кори худ оғоз хоҳад бахшид".

Сухангӯи шаҳрдорӣ афзуд, бахшида ба ҷашни истиқлолияти давлатии кишвар 21 майдончаи варзишӣ бо масоҳати умумии беш аз 27,6 ҳазор метри мураббаъ ва беш аз 10 бинои баландошёнаи истиқоматӣ, аз ҷумла ду 12-ошёна, як 10-ошёна, ҳашт 9-ошёна, як 5-ошёна бо масоҳати умумии 41,8 ҳазор метри мураббаъ ифтитоҳ хоҳанд шуд: “Ба ин муносибат 10 корхонаҳои хурди саноатӣ низ оид ба истеҳсоли маҳсулоти чопию сохтмонӣ ва маишӣ бо 150 ҷойи нави кори доимӣ аз ҷониби субъектҳои соҳибкории шаҳр ба истифода дода мешаванд”.

Шавкат Саидов таъкид кард, бахшида ба 24-умин солгарди Истиқлолияти давлатӣ дар шаҳри Душанбе 23 корхонаи саноатӣ бо 331 ҷойи кори доимӣ ба фаъолият оғоз намуданд: “Гузашта аз ин имрӯз дар шаҳр дар доираи амалисозии сиёсати иҷтимоии давлатӣ ва рушди соҳаи маориф сохтмони 6 боғчаи замонавии хусусӣ мутаносибан барои 860 кати хоб ва дар ошёнаҳои ибтидоии 6 комлексу биноҳои баландошёнаи истиқоматии бунёдшаванда марказҳои тарбиявии бачагонаи томактабӣ ва боғчаҳои бачагона барои 427 кӯдак идома дошта, танҳо дар иншооти зикршуда 260 мутахассисони ватанию хориҷӣ бо шуғл фаро гирифта шудаанд”.

Мӯҳр

Хабарҳои монанд: