14 июл 2015 11:26Тоҷикистон / Дин ва зиндагӣ

Маҳкумияти шогирди "Домулло Сироҷиддин" ба 5,6 соли зиндон

Умед Ҷаборов, маъруф ба шайх “Умеди Салафӣ” ва яке аз шогирдони домулло Сироҷиддин аз сӯи Додгоҳи ноҳияи Исмоили Сомонии шаҳри Душанбе барои 5,6 сол аз озодӣ маҳрум шудааст.

Ҷаборов дар барангехтани кинаю адовати динӣ ва ташвиқу тарғиби равияи “Салафия”, ки фаъолияти он дар Тоҷикистон мамнӯъ мебошад, айбдор эълон шудааст. Дафтари матбуоти Додгоҳи шаҳри Душанбе рӯзи 13 июли соли равон дар шарҳи ин хабар навиштааст, “Ҷаборов аз Муҳарамов Маҳмадӣ, машҳур ба “Шайх Маҳмадӣ” ва домулло Сироҷиддин ном шахсони ба тафтишот номуайян, таълимоти динии равияи “Салафия”-ро омӯхтаааст”.

Ба иттилои манбаъ, Ҷаборов гӯиё то вақти боздошт шуданаш бо маслиҳати пешакии Домулло Сироҷиддину Шайх Маҳмадӣ дар ҳудуди шаҳри Душанбе, аз ҷумла дар Масҷиди маркази пойтахт бо номи “Ҳоҷи Яқуб” ва маъракаву маросими мардум ба барангехтани кинаву адовати динӣ машғул шуда, таълимоти мазҳаби Ҳанафияро нисбат ба таълимоти мазҳаби суннатии дини Ислом мухолиф ва инкор кардааст.

Манбаъ афзуда, Ҷобиров дар мурофиаҳои додгоҳӣ бар асоси иттиҳоми эълоншуда алайҳаш худро қисман гунаҳкор дониста, аммо гуфтааст, роҳбар ва пешвои салафиҳои шаҳри Душанбе ва берун аз он на ӯ, балки Маҳмадӣ Муҳарамов аст: “Дар ҳақиқатан роҳбарии равияи Салафияро дар Тоҷикистон Муҳарамов Маҳмадӣ Раҳматуллоевич бар уҳда дорад, ки он кас аз тарфи шаҳрванди Араб бо номи Имрон барои дар Ҷумҳурии Тоҷикистон паҳн кардани равияи Салафия маблағгузорӣ карда мешавад ва ин шахс яъне Имрон дар ш. Дубайи АМА вазифаи раиси ҷамъияти Доробиро ба уҳда дорад”.

Зикри номи домулло Сироҷиддин ва номуайянии шахсияти ӯ ба раванди тафтишот дар ҳолест, ки Сироҷиддин Абдураҳмонов, маъруф ба домулло Сироҷиддин моҳи январи соли 2010 ҳамроҳ бо ҳафт нафари дигар, аз ҷумла писараш Киромиддин Абдураҳмонов бо ҷурми пайравӣ аз ҷараёни мамнӯи Салафия ба ҳафт соли зиндон маҳкум шуд. Додгоҳи ноҳияи Сино гуфта буд, домулло Сироҷиддин ва ҳамроҳонаш бо баланд гуфтани омину рафъи ядайн (боло кардани дастҳо) миёни мусалмонон тафриқа андохтаанд. Бо гузашти се соли адои ҷазо моҳи июни соли 2013 домулло Сироҷиддин ба озодӣ баромад. Мақомот дар шарҳи раҳоии ӯ гуфтанд, “домулло Сироҷиддин аз рӯи рафтори намунавияш аз зиндон озод шуд”.

Домулло Сироҷиддин 47 сол дорад ва дар ноҳияи Абдураҳмони Ҷомии вилояти Хатлон ба дунё омадааст. То соли 2009, замони боздошташ, дар масҷиди панҷвақтаи маҳаллаи “Зарафшон”-и Душанбе ба ҳайси имом фаъолият мекардааст.

Пайравони Салафия тақрибан соли 2005 дар масҷидҳои Тоҷикистон пайдо шуда, бо руҳониёни мазҳаби ҳанафӣ бештар рӯи масоиле мисли баланд гуфтани омину хондани рафъи ядайн баҳс доштанд. Мақомоти Тоҷикистон дар оғоз ҳузури ин гуруҳро безарар дониста, сипас, дар соли 2009 онро як ҷараёни мазҳабии мамнӯъ эълон карданд.

Мӯҳр

Хабарҳои монанд: