09 июл 2015 19:41Тоҷикистон / Дидгоҳи хос
Шӯрои сиёсии ҲНИТ: "Додситонии кул салоҳияти додани баҳои сиёсиро надошт!"
Масъулини ҲНИТ дар ин изҳороти худ гуфтаанд, “Прокуратураи генералӣ ҳамчун ниҳоди ҳуқуқӣ салоҳияти додани чунин баҳои сиёсиро дар масъала надошт”.
Дар изҳорот омадааст, “Вақте талошҳои ҳизб барои пайдо кардани роҳи ҳал дар дохили кишвар, аз ҷумла зимни муроҷиат ба Прокуратураи генералӣ, ВКД, КДАМ, Ваколатдор оид ба ҳуқуқи инсон, Суди Олӣ ва дар ниҳоят ба Президенти ҶТ ҷиҳати расидагӣ ба таъқибҳову фишорҳои ғайриқонуниву ғайриахлоқии мақомот болои аъзо ва ҷонибдорони ҳизб натиҷаи мусбат надод, Раёсати Олии ҲНИТ бо дастрасӣ ба моддаҳои 10 ва 14 Конститутсияи ҶТ водор шуд, то бо номае ба созмонҳои байналмилалӣ ва кишварҳои кафил муроҷиат намояд ва онро иқдоми истисноӣ ва ҳаққи қонунии худ медонад”.
Масъулини ҲНИТ гуфтаанд, ҳарчанд аз имзои Созишномаи сулҳ 18 сол гузашта бошад ҳам, он моҳият ва нуфӯзи худро ҳанӯз аз даст надодааст ва арзишҳое мисли сулҳ, ваҳдат, озодии баён ва раъй, ҳуқуқбунёд ва демократӣ будани давлат, ки меҳвари аслии Конститутсияи ҶТ ва Созишомаи умумии истиқрори сулҳ ва ризоияти миллӣ мебошанд, бо қатъи фаъолияти КОМ ё ИНОТ набояд дар кишвар аз байн бираванд: “Касе ё ниҳоде бо баҳонаи қатъи фаъолияти КОМ ва ИНОТ ин меъёрҳои конститутсионӣ ва арзишҳои миллиро наметавонад аз байн бибарад. Хуб мебуд, агар Прокуратураи генералии ҶТ ва дигар доираҳо қабл аз нашри изҳоротҳо ва баҳо додан ба саҳми ин ё он ҳизбу гурӯҳ дар раванди сулҳ, ба воқеиятҳо ва санадҳои имзошуда муроҷиат мекарданд, то саҳм ва нақши ҲНИТ ва роҳбари марҳуми он устод Сайид Абдуллоҳи Нуриро дар расидан ба сулҳу оштӣ аз рӯи инсоф арзёбӣ менамуданд”.
Шӯрои сиёсии ҲНИТ афзудааст, ки гӯиё пас аз интихоботи парлумонии соли 2010 то ба имрӯз аъзову ҷонибдорони ҲНИТ зери таъқибу фишор, таҳқиру тавҳини мақомоти давлатӣ қарор доранд, ки дар ин бобат садҳо шоҳид, навор, аризаву баёнот ва гузоришҳо дар бойгонии ҳизб маҳфуз аст: “Қисмате аз ин санадҳо дар муроҷиат ба Прокуратураи генералӣ ва шикоят ба Суди Оливу дигар ниҳодҳои давлатӣ пешниҳод шуда буд. Аммо ба муроҷиат ва шикоятҳои ҳизб мувофиқи қонун расидагӣ сурат нагирифт. Баръакс, баъди ин муроҷиатҳо таъқибу фишор болои масъулин ва аъзои ҳизб ба маротиб афзуд. Агар таъқибу таҳқир ва фишору тавҳин ҷой намедошт, ба муроҷиатҳо ҳам эҳтиёҷ набуд. Мақомоти ҳифзи ҳуқуқ ва расонаҳои ҳукуматӣ тайи солҳои ахир танҳо аз боби қонуншиканиҳои аъзои ҲНИТ садо баланд мекунанд, дар ҳоле ки мувофиқи изҳороти Прокуратураи генералӣ дар 5 соли ахир ҳамагӣ 45 ҷинояти аъзои ҳизб ба қайд гирифта шудааст, ки ба ҳисоби миёна дар як сол 9 ҷиноят рост меояд, ки аксари ин парвандахо боз ҳам бофтаву сохтаанд”.
Дар идомаи изҳорот иддаои масъулини Додситонии кулли кишвар дар мавриди ғайриқонунӣ хусусӣ шудани иншооти давлати аз сӯи Муҳиддин Кабирӣ, раиси ҲНИТ рад шудааст. Масъулини таъкид кардаанд, ки Муҳиддин Кабирӣ иншоот ва заминҳои атрофи беморхонаи дорои 500 кат дар ноҳияи Рудакиро, ки аз тарафи Ҳукумати ҶТ ба фурӯш гузошта шуда буд, дар биржаи фурӯши амволи давлатӣ бо роҳи қонунӣ харидорӣ намуда, ҳанӯз соли 1999 онро ба дигар ашхос ҳадя кардаааст: “Агар соҳибмулкони баъдии иншоот, ки алҳол зери фишори мақомот қарор доранд, солҳои 2009-2010 қитъаҳои замини тааллуқдошта ба иншоотро фурӯхта бошанд, он ба М. Кабирӣ чӣ рабт дорад? Қазияи 150 ҳазор долларе, ки дар изҳорот таъкид шудааст, дурӯғи маҳз ва тӯҳмат дар ҳаққи раиси ҲНИТ мебошад. Моддаи 13-и Конститутсияи ҶТ заминро моликияти истиснои давлат дониста, қонун хариду фурӯши онро манъ кардааст, вале мардум медонанд, ки ба хариду фурӯши замин дар кишвар намояндагони кадом мақомот ва ҳизб машғуланд”.
Шӯрои сиёсии ҲНИТ дар мавриди ҳамчун ҳамраъйи созмонҳои ифротгаро хонда шудани ин ҳизб аз сӯи Додситонии кулли кишвар гуфтаанд, “ба ҳамагон маълум аст, ки фақру бекорӣ, маошу нафақаи ночиз, фисқу фасод, ришвахорӣ, набуди адолати иҷтимоӣ ва волоияти қонун, эҳтиром нагузоштани мақомоти давлатӣ ба ҳуқуқ ва озодиҳои сиёсӣ ва эътиқодии шаҳрвандон ва дигар омилҳо заминаи пайдоиш ва рушди ифротгароӣ дар ҷомеаи кишвар мебошанд ва ин ҳама масоил на ба ҲНИТ, балки ба фаъолияти Ҳукумати ҶТ ва ҳизби ҳоким гиреҳ мехӯрад”.
Масъулини ҲНИТ афзудаанд, ки изҳороти ахири Додситонии кулли кишвар нақшаи баъзе аз доираҳо барои бастани ягона ҳизби расмии динӣ дар Осиёи Марказиро ошкор сохтаааст: “Бо сохтакорӣ, фишор ва таҳдид гирифтани аризаҳо ва тартиб додани протоколҳои сохта дар бораи қатъи фаъолияти шуъбаҳои минтақавӣ ба хотири мутобиқ гардонидани шароит ба талаботи моддаи 3-и Қонуни ҶТ "Дар бораи ҳизбҳои сиёсӣ” мебошад, ки доштани аъзо ва фаъолиятро дар аксарияти шаҳру ноҳияҳои кишвар пешбинӣ мекунад. Мехоҳанд шароитро тарзе вонамуд бисозанд, ки ҲНИТ дар аксари шаҳру ноҳияҳо фаъолияти худро қатъ кардааст ва замина барои бардоштани масъала ба мақомоти судӣ муҳайё гаштааст. Ин як амали ғайриқонунӣ, ғайривоқеъӣ ва ғайриахлоқӣ мебошад, ки рақибони мо пеш гирифтаанд. Дар бораи аризаҳои бо роҳи фишор ҷамъоваришуда ва қатъи иҷбории фаъолияти бахшҳо ва шуъбаҳои ҳизб дар саросари кишвар аз тарафи мақомот қарор қабул кард, ки аризаҳо беэътибор ва бастани ниҳодҳои ҳизбӣ ғайриқонунӣ буда, асоси ҳуқуқӣ надоранд. Ҳамзамон, Шӯрои сиёсии ҲНИТ эълон медорад, ки фаъолияти ҲНИТ дар тамоми шаҳру ноҳияҳо тибқи қонунгузории кишвар ва Оинномаи ҳизб идома дорад.”.
Ин шӯро дар охир бори дигар таъкид кардааст, ки ҳоло низ фурсат ҳаст, ба хотири ҳамдигарфаҳмӣ, суботу оромӣ дар кишвар омилони тамоми ин ҳама қонуншиканиҳо ба ҷавобгарӣ кашида шаванд, то волоият ва эҳтироми қонун дар ҷомеа таъмин гардад: “Дар ғайри сурат, ҲНИТ дар чаҳорчӯби Сарқонуни ҶТ ва санаду меъёрҳои дигари ҳуқуқии байналмилалие, ки Ҷумҳурии Тоҷикистон онро эътироф ва имзо гузоштааст, ҳаққи идомаи талошҳоро барои барқарор намудани ҳуқуқу озодиҳои поймолшудаи шаҳрвандони кишвар, бахусус аъзову ҷонибдоронашро дорад”.
Мӯҳр
Эзоҳ илова кунед
ХАБАРҲОИ ОХИРИН
Баҳси пурзӯр кардани ҳифзи сарҳади Тоҷикистону Афғонистон дар дидори Э.Раҳмон ва ҳайати парлумони Аврупо10:09Оғози фурӯши смартфонҳои iPhone 8 ва iPhone 8 Plus!09:49БО ЗАБОНИ ШЕЪР: Ман зи андешаи турконаи як ҳамватанам метарсам...15:34Чаро ҳукумат ҳамеша ба ТАЛКО имтиёз медиҳад?14:16“Шантаж”-и ҳамсар: Аз ҳаққи модарӣ даст накашӣ расвоят мекунам10:27Баҳси буҷа: Аз қарзи маош то қарзи хориҷӣ11:57Сарвазири Тоҷикистон бо Президенти Узбакистон мулоқот мекунад11:05Ҳимояти СММ аз cарбози тоҷики пайрави “Шоҳидони Яҳво”, ки либоси низомиро рад кард10:38АКС+ВИДЕО. Нахустин анҷумани маъюбони Тоҷикистон дар Душанбе11:51Маҷлис: Аз тағйироти кадрӣ то ваъдаи 80 мансабдор барои пулдиҳӣ аз кисаи худ15:46100 метр дуртар: Тамокукашӣ маҳдудтар шуд13:21Аз парвандаи Маҳмудов то муроҷиати ҷабрдидагони "7 бурҷ": Роҳкиро надорем (ВИДЕО)11:18Пешниҳоди журналисти тоҷик ба раҳбарони кишварҳои ҷаҳон: 2018-ро соли беяроқӣ эълон кунем!09:33Агентии зидди коррупсия гуфт, “Умед-88” ва Вазорати молия аз “Роғун” қарз гирифтаанд08:01Таърихи имрӯз: Мавлуд, ҷашн, санаҳои таърихӣ, дамои ҳаво, бозори арз07:44
АХБОРИ ҶОЛИБ
10:09, 04 ноябр 2017
ТАҚВИМ
| « Апрел 2025 » | ||||||
|---|---|---|---|---|---|---|
| Душ | Сеш | Чор | Пан | Ҷум | Шан | Якш |
| 1 | 2 | 3 | 4 | 5 | 6 | |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | ||||
