26 июн 2015 19:05Оcиёи Марказӣ / Тоҷикистон

Таваҷҷуҳи вижаи Душанбею Анқара ба ҳамкориҳо дар соҳаи маорифу муҳоҷират

Дар шаҳри Душанбе ройзаниҳо миёни вазоратҳои умури хориҷии Тоҷикистону Туркия баргузор гардид.

Ба иттилои дафтари матбуоти Вазорати умури хориҷии кишвар, ин ройзаниҳо рӯзи 26 июн таҳти раҳбарии Низомиддин Зоҳидӣ, муовини вазири умури хориҷии Тоҷикистону ҳамтои туркаш - Алӣ Кемал Айдин баргузор шудааст.

Манбаъ мегӯяд, дар мулоқоти ҳайатҳои Тоҷикистону Туркия ҳамкориҳои дуҷониба ва бисёрҷонибаи Душанбею Анқара баррасӣ шудаанд.

Инчунин ҷонибҳо ба дурнамои густариши муносибатҳо дар соҳаҳои сиёсӣ, иқтисодию тиҷоратӣ, сармоягузорӣ, илмию фарҳангӣ, маориф ва тавсеаи заминаи шартномавию ҳуқуқии ҳамкориҳо ва тақвияти робитаҳои байниидоравӣ дар самтҳои амният ва муҳочират таваҷҷуҳи вежа зоҳир кардаанд.

Алӣ Кемал Айдин, муовини вазири умури хориҷии Туркия дар садри як ҳайат рӯзи 25 июн вориди шаҳри Душанбе шуда буд. Сафари ин ҳайати Туркия ба Душанбе дар ҳолест, ки ахиран Раҷаб Тайиб Эрдуғон, раиси ҷумҳури ин кишвар аз Тоҷикистон ва дигар давлатҳо хост, фаъолияти литсейҳои туркӣ дар кишварҳояшонро манъ кунанд. Дар пайи нашри ин хабар масъулини Вазорати маориф ва илми Тоҷикистон гуфтанд, аз моҳи сентябри соли ҷорӣ литсейҳои туркӣ ба "мактабҳои хонандагони болаёқати Тоҷикистон" табдил шуда, зери назорати ин ниҳод хоҳанд буд.

Муассиси летсейҳои туркӣ Фатҳулло Гюлен дониста мешавад, ки дар Амрико ба сар мебарад. Ӯ дар гузашта аз дӯстони Эрдуғон гуфта мешуд, аммо ахиран ба назар мерасад, муносибати онҳо сард шудааст. Дархости бастани литсейҳо низ ба эҳтимоли зиёд ба ҳамин муносибат марбут аст.

Мӯҳр

Хабарҳои монанд: