22 июн 2015 13:23Тоҷикистон / Сиёсат

Интихоби раиси нави "Созандагони Ватан" ва муовинонаш аз Хатлону Суғду Бадахшон

Ташкилоти ҷамъиятии “Созандагони Ватан”, қаноти ҷавонони Ҳизби ҳокими халқӣ-демократии Тоҷикистон, ки Исфандиёр Абдураҳмонов, раиси он ба нишони эътироз аз мақомаш канор рафта буд, барои худ раҳбари нав интихоб кардааст.

Усмон Солеҳ, сухангӯи ҲХДТ дар суҳбат бо “Озодагон” гуфт, Абдулло Раҳмонзода, ҳуқушиноси 32-солаи ин ҳизб раиси нави Ташкилоти ҷамъиятии “Созандагони Ватан” интихоб гардидааст. Ба гуфтаи ҷаноби Солеҳ, раҳбари нави “Созандагони Ватан” имрӯз, 22 июн дар конфронси 4-уми ин ташкилот дар шаҳри Душанбе аз сӯи 27 аъзои Шӯрои он баргузида шуд. Инчунин дар конфронси мазкур, Фирӯза Шарифӣ, аз вилояти Хатлон, Муҳаммадҷон Аҳрорӣ, аз вилояти Суғд ва Сураҷ Чоршанбиев аз вилояти Бадахшон муовинони раиси Ташкилоти ҷамъиятии “Созандагони Ватан” таъйин шудаанд.

Исфандиёр Абдураҳмонов, раиси пешини қаноти ҷавонони Ҳизби ҳокими халқӣ-демократии Тоҷикистон бо нишони эътироз аз мақомаш истеъфо дода, гуфт, сабаби ин иқдомашро дар "бахилӣ ва маҳалчигии кормандони Кумитаи Марказии ҲХДТ" мебошад: “Давоми се моҳ ман ба ҳайси раиси “Созандагони Ватан” сидқан фаъолияти фундаменталии натиҷадор кардам. Аммо аз дастаи маҳалгароӣ ва ҷудоиандозии бисёре аз кормандои Кумитаи марказии ҲХДТ истеъфо додам. Гарчанде бисёриҳо ба ман гуфтанд, истеъфо надеҳ, ки дар назди Ҷаноби Олӣ сиёҳат мекунанд. Бигзор ҳақ ба ҳақдор бирасад. Агар барои суханҳои ҳақам азоб кашам, ин азоб паси сар мешавад, аммо бигзор Тоҷикистон обод шавад”.

Оқои Абдураҳмонов дар пайи тағйироти кадрии чанд моҳи қабл дар ҲХДТ соҳиби мақоми раиси “Созандагони Ватан” шуд. Ӯ Адҳамҷон Мирсаидовро иваз кард, ки дар дастгоҳи раисиҷумҳури Тоҷикистон вазифа гирифт.

РАҲМОНЗОДА Абдулло Қурбоналӣ

РАҲМОНЗОДА Абдулло Қурбоналӣ 21 феврали соли 1983 дар ноҳияи Фархори вилояти Хатлон таваллуд шудааст. Маълумоташ олӣ, соли 2005 Донишгоҳи давлатии миллии Тоҷикистонро бо ихтисоси ҳуқуқшинос - омӯзгор хатм карда, солҳои 2005-2009 таҳсилро дар шуъбаи ғоибонаи Аспирантураи Донишкадаи давлат ва ҳуқуқи Академияи илмҳои Ҷумҳурии Тоҷикистон идома додааст.
Фаъолияти меҳнатиашро соли 2005 ба сифати ассистенти кафедраи ҳуқуқи конститутсионӣ ва ҳуқуқи байналхалқии Донишгоҳи иқтисодии Тоҷикистон оғоз намуда, минбаъд ба ҳайси муаллими калони ҳамин донишгоҳ, мутахассиси пешбар ва баъдтар муовини сардори шуъбаи Маркази миллии қонунгузории назди Президенти Ҷумҳурии Тоҷикистон фаъолият намудааст.
Аз моҳи январи соли 2013 инҷониб ҳуқуқшиноси Дастгоҳи Кумитаи Иҷроияи Марказии Ҳизби Халқии Демократии Тоҷикистон шуда кор мекунад.

Мӯҳр

Хабарҳои монанд:

Шукрулло

Офарин!!! Абдулло Рахмонзода шахси арзанда ва аз ухдаи ин кор бо мувафакият мебарояд

Ҷавоб диҳед Иқтибос Шикоят

Хамкурси Абдулло

Абдуллоро 15 сол шуд мешиносам. Шахси коргар, хоксор ва бонангу бономус аст. Бехтарин чавонро интихоб кардед. Иншооллох "Созандагони Ватан" дар хакикат созанда мешавад. Офарин ба нафароне, ки уро интихоб карданд. Абдулло акнун он догхои Созандагонро бояд тоза куни. Кори зиёде туро дар пеш аст. Бовари дорам, ки бо сари баланд аз ухдаи он баромада, сиёсати рохбарияти ХХДТ-ро миёни чавонони созандаи кишварамон арзанда муаррифи мекуни. Бо эхтиром, хамкурсат.

Ҷавоб диҳед Иқтибос Шикоят

Шариф Солизода

Барои Рахмонзода Абдулло ва муовинонаш дар корхои ояндаашон мувафакияту комёбиҳои беназирро таманно менамоям.

Ҷавоб диҳед Иқтибос Шикоят

Хамкасб

Як маколаи илми надорад лекин аз ухдааш мебарояд. Ба пеш Нуров

Ҷавоб диҳед Иқтибос Шикоят

Рустам

Ба ки даркор хамин созандашону хизбашон. Ягон чоро обод мекунанд? Боз як лаббайгуяку лагандбардорони иловаги.

Ҷавоб диҳед Иқтибос Шикоят

Эзоҳ илова кунед