02 июн 2015 16:30Оcиёи Марказӣ / Тоҷикистон

Фарзанди Фаҳим муовини аввали раёсати амнияти миллии Афғонистон шуд

Адиб Фаҳим, фарзанди ягона маршали Афғонистон, марҳум Муҳаммад Қасими Фаҳим аз роҳбарони пешнии ҷиҳодӣ ва муқовимати Афғонистон ва яке аз наздиктарин қумандонҳои муҷоҳиддин ба Аҳмадшоҳ Масъуд ба унвони муовини аввали раёсати Амнияти миллии Афғонистон таъин шуд. Адиб Фаҳимро доктор Абдулллоҳ Абдуллоҳ, раиси ҳукумати иҷроии Афғонистон барои ҳамкоронаш муаррифӣ кардааст.

Абдуллоҳ Абдуллоҳ дар маросими муаррифии Адиб Фаҳим гуфтааст, ки “эшон фарзанди бунёдгузори амнияти миллии кишвар маршал Муҳаммад Қасими Фаҳим аст ва ман барояш орзуи муваффақият мекунам”.

Раҳматуллоҳ Набил, раиси умури амнияти миллии Афғонистон дар ин маросим ба мансаб омадани Адиб Фаҳимро қадаме ба суйи тараққӣ ва пешрафти созмони зери раҳбарияш хондааст.

Таъини фарзанди Фаҳим ба мансаби муовини аввали раёсати амнияти миллии Афғонистон дар ҳолест, ки бо гузашти бештар аз як сол ҳукумати ваҳдати миллии Афғонистон танҳо дар ҳафтаи пеш муваффақ шуд, ки раиси амнияти миллии ин кишвар дар парлумон қабул шавад.

Муҳаммад Қасими Фаҳим аз ҷумлаи бунёдгузорони низоми навини кишвараш ва ҳомии суботу ҳамбастагии Афғонистон дониста мешуд. Абдуллоҳ Абдуллоҳ дар маросими муаррифии Адиб Фаҳим аз падараш чунин ёд кардааст: “Вай тамоми талоши мумкинро дар мавриди шаклдиҳии сохторҳои сиёсии фурӯрехтаи Афғонистон кард ва дар канори дигар давлатмардони Афғонистон пояҳои як давлати демократӣ ва мардумиро мустаҳкам сохтааст”.

Қасими Фаҳим соли 1957 дар Панҷшери Афғонистон таваллуд шудааст. Таҳсилоти ибтидоиро дар зодгоҳаш фаро мегирад ва ба хотири пешбурди таҳсилот дар соли 1972 вориди мадраси Дорулъулуми арабии Кобул мешавад. Дар соли 1980, пас аз кудато барои иштирок дар ҷиҳод алайҳи режими куммунистӣ ба Покистон ҳиҷрат намуда, баъдан ба Афғонистон бармегардад ва муборизаи муссалаҳонаи худро идома медиҳад.

Баъд аз суқути ҳукумати доктор Наҷибуллоҳ ва пирӯзии муҷоҳиддин дар 5 саври соли 1371-и хуршедӣ дар раъси неруҳои муҷоҳиддин вориди Кобул гардид ва дар ҳамин сол ба ҳайси вазири амнияти кишвараш муқаррар мешавад. Бо сайтараи Толибон дар соли 1996 барои чанд муддат ба ҳайси фармондеҳи умумии неруҳои муқовимат дар вилоёти шимоли Кобул ифои вазифа менамояд.

Баъди шаҳодати Аҳмадшоҳ Масъуд роҳбарон ва фармондеҳони муҷоҳиддин ба манзури инсиҷоми беҳтари неруҳои муқовимат ва мудирияти буҳронитарин шароит Муҳҳамад Фаҳимро ба унвони фармондеҳи кулли неруҳои давлатӣ ва муқовимат интихоб намуданд. Баъд аз конфронси Бон ва эҷоди идораи муваққат ба ҳайси муовини аввал ва вазири дофои миллӣ таъин шуд. Моҳи майи соли 2002 ба поси хадамоти арзанда ва нақши ҳамаҷонибааш дар озодии ватанаш баландтарин рутбаи низомии Афғонистон, яъне маршалро дарёфт мекунад.

Маршал Муҳаммадқасими Фаҳим, 9 марти соли 2014, замоне ки масъулияти ноиби аввали раисиҷумҳури исломии Афғонистонро дошт ва ба унвони яке аз пешвоёни тоҷикони ин кишвар шинохта мешуд аз дунё даргузашт. Дар робита ба даргузашти Муҳаммадқасими Фаҳим ҳукумати Афғонистон се рӯз мотам эълон карда буд.

Адиб Фаҳим 30-сола буда, ба унвони дипломат ва сиёсатмадори ҷавон дар Афғонистон шинохта мешавад. Ӯ фориғуттаҳсили донишкадаи ҳуқуқ ва равобити байналмилалии Донишгоҳи Кобул, риштаи равобити байналмилали Донишгоҳи Шарҷаи Аморати муттаҳидаи Араб ва давраи магистратураи яке аз донишгоҳҳои Ню Йорк дар риштаи идора ва полиси омма мебошад.

То ин замон Адиб Фаҳим дар вазифаҳои муовини раёсати полисӣ ва назорат дар дафтари Шурои амнияти миллӣ, муовини раёсати иқтисодии Вазорати хориҷа ва раиси раёсати дувуми сиёсии Вазорати хориҷа кор кардааст. Пас аз даргузашти падараш аз симаташ дар Вазорати хориҷа истефоъ дода ба ҳайси ҷонишини муовини аввали раисҷумҳури Афғонистон дар умури равобити мардумӣ таъин гардида буд.

Мӯҳр

Хабарҳои монанд: