24 апр 2015 09:31Тоҷикистон / Иқтисодӣ

Баҳои баланди Э.Раҳмон барои бунёди корхонаи масолеҳи сохтмонӣ дар Данғара

Эмомалӣ Раҳмон, раисиҷумҳури Тоҷикистон, имрӯз, 24 апрел аз деҳаи Ҳусейншайхи ҷамоати деҳоти Корези ноҳияи Данғара боздид намуда, дар ин маҳалла ба сохтмони корхонаи масолеҳи сохтмонии “Дарё-2015” оғоз бахшидааст.

Тибқи иттилои дафтраи матбуотии раисиҷумҳури Тоҷикистон, ин корхона дорои коргоҳҳои зиёд барои истеҳсоли қуми шуста, шағал, масолеҳи бетонӣ, дару тирезаҳои пластикӣ, болопӯшҳои тунукагии бомҳо, сафолҳои роҳрав, симтур, ҷамъ 12 намуд масолеҳи сохтмонӣ мебошад. Манбаъ мегӯяд, коргоҳи қуми шуста ва шағали корхона, ки бо технологияи навтарини соҳа бунёд меёбад, дар минтақа нахустин буда, тибқи лоиҳа дар як соат то 240 тонна қуми шустаю шағал тавлид хоҳад кард. Тибқи нақша дар назар аст, корхонаи мазкур моҳи июли соли равон ба кор дарояд: “Дар давраи сохтмони ин коргоҳҳо 100 нафар бо кори муваққатӣ ва пас аз ба кор даромаданаш 240 кас бо кори доимӣ таъмин мешаванд. Танҳо дар коргоҳи дӯзандагӣ 55 нафар занону духтарони маҳаллӣ соҳиби кори доимӣ мешаванд”.

Дафтари матбуотии раисиҷумҳури Тоҷикистон мегӯяд, Эмомалӣ Раҳмон ба ташаббуси соҳибкорон баҳои баланд дод, зеро то ин вақт дар Данғара чунин корхона вуҷуд надошт ва ин гуна масолеҳи сохтмон аз роҳҳои дур кашонда мешуд. Раисиҷумҳури кишвар изҳори боварӣ кардааст, ки ба кор даромадани ин корхона ва наздик шудани масофаи манбаи масолеҳ арзиши аслии корҳои сохтмонӣ дар ин минтақа камтар мешавад. Ба иттилои манбаъ, дар ҳудуди корхона, ки дар майдони қариб 30 гектар ба як маҷмааи калони саноатию кишоварзӣ табдил хоҳад ёфт, ҳамчунин коргоҳҳои дӯзандагӣ, равғанкашӣ, боғҳои дарахтони мевадиҳанда ва ороишӣ ва ҳам ҳавзи моҳипарварӣ бунёд хоҳад ёфт.

Сафари кории раисиҷумҳур Эмомалӣ Раҳмон ба ҷануби кишвар рӯзи гузашта аз ноҳияи Темурмалик оғоз ёфт.

Мӯҳр

Хабарҳои монанд: