28 мар 2015 13:06Оcиёи Марказӣ / Тоҷикистон

Фарҳод Дарё: Қатли Фархунда -натиҷаи ноогоҳии динӣ аст

Фарҳод Дарё, овозхони маъруфи афғон, зимни мусоҳибаи худ бо Би Би Сӣ дар робита бо қазияи кушта шудани Фархунда гуфтааст, ки дар Афғонистон пас аз таҳаввулоти якуним даҳаи ахир интизори чунин ҳодисае мерафт.

Ӯ мегӯяд ҳарчанд дар тӯли солҳои ахир заминаҳо барои рушди ҷомеаи маданӣ, ҳуқуқи башар ва чизҳои дигар бештар муҳаё шуд ва Афғонистон ҳам ба дастовардҳои азиме даст пайдо кард: “Аммо, ин ҳақиқатро ҳаргиз фаромӯш накунем, ҷомеаи маданӣ ва андешаҳои ифротӣ дар канори ҳам рушд карданд. Тафовут назар ба гузашта ин аст, ки мо ба унвони як ҷомеаи огоҳтар аз дирӯз ба инояти расонаҳо метавонем аз бахши азиме аз ингуна ҳаводису ҷиноёт бохабар шавем”.

Ин овозхони саршинос мисол мезанад, ки агар дар гузашта як муллои масҷид дар ҳаққи як кӯдак кори хилофи ахлоқ мекард танҳо мардуми маҳал ё кӯча аз ӯ огоҳ мешуд ва боқии мардум он ҳодисаро дар он маҳал дафн мекарданд. Оқои Дарё меафзояд, ки ҳаводисе ба ин монанд тавассути одамоне сурат мегирад, ки расман ба ҳеч гуруҳи ифротӣ тааллуқ надоранд. “Балки бештари ин ҳодисаҳо реша дар набуди огоҳии мардум аз омӯзаҳои динӣ, масъулиятҳои шаҳрвандӣ ва ҳузури хурофот дар ҷомеа ва нақши заифи ҳукумат дар раванди ислоҳ ва тағйир дар ҷомеа аст”- мегӯяд Фарҳоди Дарё.

Ӯ ба ин суол, ки оё ҳунармандон дар ин шароит метавонанд нақше дошта бошанд, мегӯяд: “Мавзеи зан ва ҳунарманд дар ҷомеаи баста ва суннатии Афғонистон мушобеҳ ба ҳам аст. Ҳардуяшон осебпазиранд ва бештар аз ақшори дигари ҷомеа мавриди ҳуҷуми афкори ифротӣ қарор мегиранд. Пайёми ҳунарманд ба хотири ҷойгоҳаш дар ҷомеа ба зеҳнҳои омма сахт асаргузор аст ва ҳатто фаротар аз паёмҳои сиёсиву ҳукуматӣ ҳам густариш пайдо мекунад. Пас ҳунарманд дар баробари паёме, ки мефиристад масъул аст ва лозим аст ӯ худаш пештар аз фиристодани паём дарку фаҳми дурусту кофӣ аз ингуна ҳаводис ва решаҳои он дошта бошад”.

Фарҳоди Дарё таъкид мекунад, ки хуб мешуд, агар ҷомеаи мусиқии афғонӣ ҳадди ақал тавассути як паёми муштарак мавзеи худро дар қиболи ин масъала бо ҷомеа шарик месохт, вале бо таассуф ин чиз иттифоқ науфтод.

Мӯҳр

Хабарҳои монанд: