17 мар 2015 10:02Оcиёи Марказӣ / Тоҷикистон

Ҷонибдории ҳамаи вакилон аз номзадии раиси вилояти Суғд ба Маҷлиси миллӣ

Номзадии Абдураҳмон Қодирӣ, раиси вилояти Суғд ба узвияти Маҷлиси миллии Маҷлиси олии Тоҷикистон пешниҳод шудааст.

Ба иттилои дафтари матбуоти ҳукумати маҳаллии Суғд, номзадии Қодирӣ дар нахустин ҷаласаи вакилони халқи тозаинтихоби вилоят пешниҳод гардидааст. Манбаъ мегӯяд, пешбарии номзадии Қодирӣ дар асоси раъйдиҳии пинҳонӣ сурат гирифта, ҳамаи 69 вакил аз он ҷонибдорӣ кардааст.

Абдураҳмон Қодирӣ 62 сол дошта, зодаи ноҳияи Бобоҷон Ғафурови вилояти Суғд мебошад. Аз соли 1996 то 2002 дар вазифаҳои муовини раиси вилоят кор карда, солҳои 2002-2004 дар мансаби муовини аввали раиси вилояти Суғд ва солҳои 2004-2006 дар вазифаи раиси ноҳияи Зафаробод фаъолият доштааст.

Соли 2006 бо дастури Эмомалӣ Раҳмон, раисҷумҳури Тоҷикистон вазири кишоварзӣ ва ҳифзи табиати кишвар таъин гардида, соли 2008 дубора муовини аввали раиси вилояти Суғд баргузида шуд. Барои фаъолияти меҳнатиаш бо мукофотҳои давлатии ордени “Шараф” дараҷаи 1 ва бо медали ҷашнии “10 солагии Иҷлосияи 16-уми Шӯрои Олии Ҷумҳурии Тоҷикистон” сарфароз гардидааст.

23 ноябри соли 2013 иҷрокунандаи вазифаи раиси вилояти Суғд таъин гардида, аз 15 феврали соли 2014 бо дастури Эмомалӣ Раҳмон ба ҷои Қоҳир Расулзода, сарвазири кунунии Тоҷикистон ба курсии раҳбарии раиси вилояти Суғд нишаст.

Аз ин пеш дар нахустин ҷаласаи Маҷлиси вакилони шаҳри Душанбе номзадии Маҳмадсаид Убайдуллоев, шаҳрдори Душанбе ва аз шаҳри Кӯлоб, номзадии Хайрулло Амонулло, раиси ин шаҳр ба узвияти Маҷлиси миллӣ пешниҳод шуд.

Бар асоси фармони Эмомалӣ Раҳмон, раисҷумҳури Тоҷикистон интихоботи даъвати нави аъзои Маҷлиси миллии Маҷлиси олии Ҷумҳурии Тоҷикистон ё худ палатаи болоии парлумони кишвар 27 марти соли 2015 таъйин шудааст.

Мӯҳр

Хабарҳои монанд: