13 мар 2015 08:11Тоҷикистон / Иқтисодӣ / Тема дня

Разоқов дар азхудкунии 360 000 ва фиреби дастгоҳи Президент муттаҳам мешавад

Агентии назорати давлатии молиявӣ ва мубориза бо коррупсияи Тоҷикистон аз боздошти Зайниддин Разоқов, раҳбари Ҷамъиятҳои дорои масъулияташ маҳдуди “Фатҳ 2010” ва “Строй Гигант” хабар додааст, ки дар тақаллубкорӣ, аз ҷумла азхудкунии 360 ҳазор сомонӣ айбдор мешавад.

Ба иттилои дафтари матбуоти Оҷонсии зидди фасоди молии кишвар, ин 360 ҳазор сомонӣ андози маблағе мебошад, ки Разоқов аз рӯи протоколи тендер ва шартнома бо дастгоҳи иҷроии президент барои харидории компютеру принтер соҳиб шудааст. Манбаъ мегӯяд, ин соҳибкори тоҷик ба ҷойи супоридани ин маблағ ба Кумитаи андози Тоҷикистон ҳисобнома-фактураи андоз аз арзиши иловашудаи қалбакиро ба Дастгоҳи иҷроии президент пешниҳод намудааст: “20 сентябри соли 2013 маблағи 4 447 600 сомонии аз рӯи протоколи тендер ва шартномаи №2489.1-1041 аз 19 сентябри соли 2013 аз ҷониби Дастгоҳи иҷроияи Президенти Ҷумҳурии Тоҷикистон барои харидори намудани 1563 адад компютер ва 160 адад принтер интиқолдодаро аз хазинаи Бонки давлатии амонатгузории Ҷумҳурии Тоҷикистон “Амонатбонк” гирифта, аз ҳисоби ин маблағҳои пулӣ, маблағи 360 000 сомониро, ки барои пардохти андозҳо муайян шуда буд, ба манфиати худ сарф намуда, оид ба ин амалиёт ба фармоишгар (Дастгоҳи иҷроияи Президенти Ҷумҳурии Тоҷикистон) ҳисобнома-фактураи андоз аз арзиши иловашудаи қалбакиро пешниҳод намудааст”.

Ба иддаои масъулини оҷонсӣ ин соҳибкори тоҷик аз ҳисоби маблағи моҳи марти соли 2014 аз бозори фурӯши воситаҳои нақлиётии шаҳри Душанбе, ба маблағи 196 000 сомонӣ, ки муодили 40 000 доллари амрикоӣ аст, автомашинаи тамғаи “Каделак-Эскалид” (внедорожник), соли бароришаш 2007-ро харидорӣ карда, бо ин роҳ он маблағро ба расмият даровардааст: “Инчунин дар пайи тафтиши корхонаҳои таҳти раҳбарии ӯ, 2 074 678,75 сомонӣ пинҳонкунии андозҳо ошкор шудааст”.

Масъулини оҷонсии зидди фасоди молӣ мегӯянд, ҳоло Разоқов дар ҳабси пешакӣ қарор дорад.

Мӯҳр

Хабарҳои монанд: