12 мар 2015 11:43Оcиёи Марказӣ / Қазоқистон

Баҳои 5-и Назарбоев барои фаъол буданаш дар имтихон

Номзадии Нурсултон Назарбоев, раисҷумҳури Қазоқистон расман ба мақоми президентӣ дар интихоботи пешазмуҳлати кишвараш ба қайд гирифта шуд.

Тибқи иттилои Комиссияи марказии интихоботи Қазоқистон, Назарбоев рӯзи 11 март дар имтиҳони забони давлатии ин кишвар комёб шуда, ҳамчун номзад ба мақоми президентӣ сабти ном шудааст.

Мирзатай Жолдасбеков, раиси Комиссияи ташхиси забоншиносии Комиссияи марказии интихоботи Қазоқистон дар шарҳи ин хабар гуфтааст, “Назарбоев дар се даври ин имтиҳон комёб шуд. Дар нақли хаттӣ, ки дар мавзуи “Нерӯи мо барои муттаҳидӣ” навишт, ягон хатое наёфтем, бисёр хуб навиштааст. Дар даври дуюм, қитъае аз эҷодиёти донишманди Есенберлинро бисёр олӣ хонд ва дар даври ниҳонӣ, ки дар бораи ҳикмати аҷдодон суҳбат кард, низ фаъол буд ва мо якдилона ба хулосае омадем, ки ӯ забони давлатиро дар сатҳи хеле баланд медонад”.

Ба гуфтаи раиси Комиссияи ташхиси забоншиносии Комиссияи марказии интихоботи Қазоқистон, Нурсултон Назарбоев ин се даври имтиҳон аз забони давлатиии кишварашро дар 1 соату 20 дақиқа супоридааст.

Нурсултон Назарбоев соли 1940 дар ҷумҳурии шӯравии сотсиалистии Қазоқистон ба дунё омадаааст. Ӯ аз соли 1984 то 1989 раҳбарии Шӯрои вазирони ин ҷумҳуриро бар уҳда дошт. Соли 1989 ба ҳайси раҳбари Кумитаи марказии Ҳизби коммунистии Қазоқистон интихоб шуда, то соли 1991 дар ин симмат кор кардааст. Дар пайи пошхурии Иттиҳоди шӯравӣ моҳи декабри соли 1991 ба ҳайси нахустин президенти Қазоқистон ба курсии раҳбарии кишвараш нишаст ва инак то ҳол бо ислоҳу тағйири пайдарпайи Қонуни асосӣ (конситутсия)-и Қазоқистон, бузургтарин кишвари Осиёи Марказӣ аз лиҳози қаламраву захираҳои табиӣ ва ҳаҷми иқтисодро раҳбарӣ мекунад. Интихоботи президентии Қазоқистон мебоист дар соли 2016 баргузор мешуд, вале бо пешниҳоди Маҷмааи халқии Қазоқистон ва қабули ҳукумату парлумони ин кишвар интихоботи президентии қабл аз муҳлат эълон гардид. Ин раъйдиҳӣ 26 апрели соли равон баргузор хоҳад шуд. Гуфта мешавад, номзади аслӣ ҳамоно Нурсултон Назарбоев хоҳад буд, вале то ҳол аз даҳ нафар, аз ҷумла Аскар Сиргабоев, Сафиолла Алдаҷонов, Лимина Койшиева, Бахит Абдукаримов ва Суҳроб Мирзошов номзадии худро ба мақоми президентии Қазоқистон пешниҳод кардаанд.

Мӯҳр

Хабарҳои монанд: