05 мар 2015 11:26Тоҷикистон / Дидгоҳи хос

Ифшои ҷузъиёт ва гунаҳкорони садамаи ҳавоӣ дар Кӯлоб

Кумитаи байнидавлатии ҳавонавардӣ бо нашри як гузориш мегӯяд, соли 2014 дар қаламрави Иттиҳоди Давлатҳои Мустақил 47 ҳодисаи нохуши ҳавоӣ ва садамаҳо ба қайд гирифта шудаанд, ки якеаш дар Тоҷикистон рух додааст.

Ба иттилои манбаъ, 38 ҳодисаи нохуши ҳавоӣ дар Русия, чор ҳодиса дар Қазоқистон, се то дар Украина, яке дар Тоҷикистон ва як ҳодисаи дигар дар Молдов рух дода, дар натиҷа 81 нафар ба ҳалокат расидаанд.

Кумитаи байнидавлатӣ дар ин гузориш ҷузъиёти садамаи тайёраи ширкати “Ист-Эйр” дар фурудгоҳи Кӯлобро, ки 2 феврали соли 2014 рух дода, баъдан яке аз омилҳои қатъи фаъолияти ин ширкат арзёбӣ шуд, ифшо намудааст. Инчунин гунаҳкорони қазияро ҳам ном бурдааст.

Манбаъ мегӯяд, тайёраи А-320-и “Ист-Эйр” бо 187 мусофир, 2 халабон, 4 хидматрасони тайёра ва як мусофири хидматӣ аз Домодедова ба Кӯлоб парвоз дошт: “Вазъи тайёра ва кори халабонҳо мутобиқи меъёрҳо сурат гирифт ва ягон камбудие надошт. Идоракунандаи парвозҳои фурудгоҳи Кӯлоб барои нишаст ба халабонҳо иҷозат дод, дар ҳоле ки хатти нишаст барои қабули тайёра омода набудааст. Аз ҷумла, паҳноии хатти нишаст 45 метр аст, аммо ҳамагӣ 22 метри паҳноӣ аз барф тоза шуда буд ва қад-қади қисмати тозашуда тӯдаи барфи баландиаш аз 50 то 95 сантиметр ба вуҷуд омада буд. Баъди 2 сонияи нишаст чархи тарафи рости тайёра ба тӯдаи барф бархӯрда, қад-қади сарҳади рости хатти парвоз ҳаракатро идома дод. Баъди 480 метр аз сабаби ворид шудани барфи зиёд ва тахриби чархи пеши тайёра ҳар ду муҳаррик аз кор монданд. Дар натиҷа тайёра 1190 метр дуртар аз оғози хатти парвоз ва 20 метр дуртар аз сарҳади рости хатти парвоз қарор гирифт”.

Кумита мегӯяд, дар ин ҳодиса, ки бе талафоти ҷонӣ ва сӯхтор анҷом ёфт, идоракунандаи парвозҳои фурудгоҳ гунаҳкор аст, ки барои қабули тайёра дар хатти омоданашуда иҷозат дод ва ё ҳадди ақал барои таъхири нишаст то мувофиқ кардани хатти парвоз чораандешӣ накард.

Ин дар ҳолест, ки қаблан раёсати авиатсияи шаҳрвандии Вазорати нақлиёти Тоҷикистон гуфт, санҷиши дарозмуддат нишон дод, ин садама аз беэҳтиётии масъулони ширкат рух додааст.

“Ист-Эй” аз фурудгоҳҳои Кӯлоб ва Қӯрғонтеппа ба шаҳрҳои мухталифи Русия парвоз анҷом медод, аммо тирамоҳи соли гузашта иҷозатномаи парвозаш аз ҷониби Вазорати нақлиёт бо далели ислоҳ нашудани камбудиҳо қатъ карда шуд.

Мӯҳр

Хабарҳои монанд: