03 мар 2015 16:20Тоҷикистон / Сиёсат / Рӯ ба рӯ / Тема дня

Ҳукми нави Қудратов: 87 ҳазор ҷаримаю 3 солу 8 моҳи зиндон, Зоиров норозист

Додгоҳи олии Тоҷикистон ҳукми зиндони Шуҳрат Қудратов, ҳуқуқшиноси тоҷикро аз рӯи моддаи 247-и Кодекси ҷиноӣ лағв карда, ӯро аз рӯи ин модда 87 ҳазору 600 сомонӣ ба фоидаи давлат ҷарима бастааст.

Дар ин бора ба “Озодагон” Раҳматилло Зоиров, вакили дифои Шуҳрат Қудратов иттилоъ дода, афзуд, ки ҳукм аз рӯи моддаи 320, яъне пешниҳоди пора бетағйир гузошта шуд: “Қаблан аз рӯи моддаи 320 Қудратов ба 6 соли зиндон маҳкум шуда буд. Бо назардошти беш аз 7 моҳи боздошту татбиқи қонуни афв айни ҳол 3 солу 8 моҳи дигари зиндон мондааст”.

Аммо Раҳматилло Зоиров таъкид намуд, ки аз қарори додгоҳ нисбати ҳар ду парвандаи Шуҳрат Қудратов, яъне 87 ҳазор ҷаримаю 3 солу 8 моҳи зиндони ӯ розӣ нест ва аз болои он шикояти назоратӣ хоҳад бурд.

Ин дар ҳолест, ки 13 январи соли равон Тоҳирбек Мусобекзода, додраси додгоҳи шаҳри Душанбе Шуҳрат Қудратовро бар асоси ду моддаи Кодекси ҷиноӣ – 320 (додани пора) ва 247 (қаллобӣ) барои 9 сол равонаи зиндон кард. Мусобекзода зимни эълони ҳукм изҳор дошт, бо назардошти қонуни афв аз се як ҳиссаи муҳлати ҷазои Қудратов кам шуд ва аз рӯи ҳар ду парвандаи ҷиноӣ - қаллобӣ ва фасодкорӣ дар маҷмуъ 9 сол аз озодӣ маҳрум гардид. Инчунин тибқи қарори додгоҳ баъди адои ҷазо Қудратов ду сол ҳаққи фаъолияти адвокатиро нахоҳад дошт. Раисикунандаи мурофиа изҳор дошт, ин ҳукм бо назардошти ҳолатҳои сабуккунанда, аз ҷумла бори аввал даст ба ҷиноят задани маҳкумшуда ва фарзандони ноболиғаш содир шудааст.

Ин ҳукм вокиниши шадиде миёни ҳомиёни ҳуқуқи башар ба вуҷуд оварда, созмонҳои байналмилалӣ онро сиёсӣ ва нақши ҳукумати иҷрияро дар он калидӣ хонданд. Ба дунбол, рӯзи 21 январ Раҳматило Зоиров аз ин ҳукм ба Додгоҳи олӣ шикоят бурд.

Мӯҳр

Хабарҳои монанд: