04 фев 2015 16:25Тоҷикистон / Сиёсат

Бобозода куштори профессори ҷопониро дар Тоҷикистон шарҳ дод

Ғуломҷон Бобозода, собиқ вазири рушди иқтисоду савдо ва сафири феълии Тоҷикистон дар Ҷопон бо рӯзноманигорони расонаи хабарии “Nippon” дар бораи рушди иқтисодӣ, иҷтимоӣ ва сиёсии кишвар суҳбат кардааст.

Бобозода раванди гузариш аз иқтисоди нақшагӣ ба иқтисоди бозориро зикр карда, раисиҷумҳур Эмомалӣ Раҳмонро муаллифи иқтисоди бозорӣ дар Тоҷикистон хондааст. Ӯ афзудааст, ки вазъи феълии Тоҷикистон нишон медиҳад, ки роҳбарият ва давлат роҳи дурустро пеш гирифтаанд.

Дар миён рӯзноманигорони ҷопонӣ зикр кардаанд дар солҳои даргирии дохилӣ дар Тоҷикистон, профессори Донишгоҳи Сукуба, Акино Ютака ба ҳалокат расидааст ва аз сафири Тоҷикистон дархост кардаанд, ки онро шарҳ диҳад. Бобозода посухашро аз он оғоз кардааст, ки солҳои 90-уми асри гузашта нерӯҳое, ки хостанд сохтори ҷамъиятӣ-сиёсиро иваз кунанд, тавонистанд Тоҷикистонро ба гирдоби ҷанги дохилӣ кашанд: “Дар роҳи барқарорсозии сулҳ, ки роҳбарияти давлат ва халқ барои он талош мекарданд, кӯмаки Созмони Милали Муттаҳид, аз ҷумла писари фарзонаи халқи Ҷопон-Акино Ютака бузург буд. Ӯ ҳамеша ғами тақдири мардумро мехӯрд ва дарк мекард, ки дар чӣ гуна вазъи мураккаб Тоҷикистон қарор дорад. Вай дар ҳайати СММ тамоми имконоташро ба кор бурд, то дар Тоҷикистон сулҳ барқарор шавад.”

Сафири Тоҷикистон илова кардааст, ки мардуми тоҷик аз профессори марҳум бо миннатдорӣ ёд мекунад ва бархе муассисаҳо, аз ҷумла мактаб-интернат ба номи Акино Ютака гузошта шудааст: “Акино Ютакаро, ки ба таври фоҷиабор соли 1998 дар Тоҷикистон ба ҳалокат расид, мардум ёд дорад. Эмомалӣ Раҳмон, раисиҷумҳури Тоҷикистон низ соли 2007 зимни боздидаш аз Ҷопон Ютакаро ёд карда, барои иштирокаш дар раванди барқарорсозии сулҳ изҳори миннатдорӣ карду ба хешону наздиконаш изҳори ҳамдардӣ намуд.”

Акино Ютака дар қатори ҳайати нозирони СММ-майори поляк, Ришард Швезик, майори Уругвай, Адолфо Шарпегю ва тарҷумон-ронандаи тоҷик Маҳкамов зимни ҳаракат аз ноҳияи Тавилдара ба тарафи маҳаллаи Лабиҷар ҳадафи тирпаронии афроди номаълум қарор гирифта, ба ҳалокат расида буданд. Эмомалӣ Раҳмон он вақт ин қазияро кори дасти афроде хонд, ки мухолифи раванди барқарорсозии сулҳ дар Тоҷикистон мебошанд.

Мӯҳр

Хабарҳои монанд: