02 фев 2015 15:29Оcиёи Марказӣ / Тоҷикистон

Хабари 20 соат беҳушии Каримов дар арафаи 77-солагӣ

Торнамои Ҳаракати мардумии Узбакистон, ки аз сӯи мухолифини ҳукумати феълии ин кишвар таъсис ёфтааст, менависад, раисиҷумҳур Ислом Каримов беш аз 20 соат дар ҳолати беҳушӣ ё худ кома будааст.

Тибқи иттилои торнамои расмии Ҳаракати мардумии Узбакистон, ки фошкунандаи асосии асрори долонҳои ҳукумати Каримов арзёбӣ мешавад, раисиҷумҳури Узбакистон тақрибан соати 20:30 дақиқаи 28-уми январ зимни хӯрдани ғизои шом дар Кохи Куксарой беҳуш шуда, афтидааст: “Дар пайи ироаи кӯмаки фаврии тиббӣ, ҳайати табибони Беморхонаи марказии Узбакистон низ ба Кохи Куксарой даъват шуданд.”

Манбаъ мегӯяд, ба хотири огаҳӣ аз вазъи саломатии раисҷумҳури Узбакистон фавран Иноятов Р- раиси Кумитаи амнияти миллӣ, Мирзоеф Ш.- сарвазир ва Тоҳирӣ М.- раиси Хадамоти амнияти президенти ин кишвар ба Кохи Куксарой ҳозир шудаанд: “Ниҳоят соати 17:00-и рӯзи 29-уми январ Ислом Каримов ба худ омадааст.”

Ҳаракати мардумии Узбакистон мегӯяд, табобати Каримов рӯзи 30-юми январ, ки мавлудаш аст, идома ёфтааст ва ӯ ба кор нарафтааст.

Ислом Каримов, ки 30-юми январ ба синни 77-солагӣ расид, аз соли 1989 курсии раҳбарии Узбакистонро дар даст дорад ва бори дигар номзадии худро барои соҳиб шудани ин мақом барои як давраи дигар пешниҳод кардааст. Ӯ бори охир соли 2007 ба муҳлати 7 сол ба ин симмат интихоб гардида буд.

Ислом Каримов 30 январи соли 1938 дар шаҳри Самарқанд ба дунё омадааст. Аз соли 1989, вақте котиби аввали Кумитаи марказии Ҳизби коммунистӣ шуд, Узбакистонро раҳбарӣ мекунад. Моҳи марти соли 1990 дар ҷаласаи Шӯрои олии Узбакистони шӯравӣ президент интихоб гардид ва дар чанд интихоботи раёсатҷумҳурие, ки дар кишвараш баргузор шуд, дастболо гардид. Каримовро дар Тоҷикистон ба унвони рақиби сарсахти бунёди неругоҳи “Роғун” мешиносанд. Дар масъалаи истифодаи об Тошканд ҳамеша бо Душанбе ихтилофи назар дорад. Боздошти қаторҳо, мошинҳои молу коло дар қаламрави Узбакистонро ҳам ба ҳамин ихтилофҳо рабт медиҳанд.

Мӯҳр

Хабарҳои монанд: