13 янв 2015 10:42Тоҷикистон / Акс
АКС: Сафардидаҳои як журналисти тоҷик аз Красноярск
Як соли зиндагиву фаъолият миёни мардуми бумӣ ва муҳоҷирони кории шаҳри Красноярски Русия боис шуд, шинохти муайяне аз ҳамгироии миллатҳо ва ақалиятҳои ин минтақаи Сибир дошта бошам. Махсусан, аз ҳолу ҳавои ҳамватанон то ҷое огаҳӣ пайдо кардам. Ин тасаввури мо шояд то ҷое мутаззод ва ё ба дидгоҳе муқобил бошад. Ба ҳар ҳол, саъй мекунам, ба ривояти чанд ҳарфу тасвири воқеӣ тӯшаи чашмамро пешкаши шумои азиз гардонам.
(аз баёноти сайёҳии як журналисти тоҷик)
Теъдоди тоҷикони шаҳри Красноярск ҳудуди 8,5 ҳазор гуфта мешавад. Тибқи омори рӯи даст, миёни ҳамватанони мо дар ин шаҳр хизматчиёни давлатӣ, омӯзгорон, вакилони дифоъ, тарҷумонҳо, кормандони мақомоти ҳифзи ҳуқуқ, 3 ҷарроҳи варзида, 1000 хонандаи мактаб, 642 донишҷӯ, даҳҳо соҳибкори шинохташудаву фаъоли ҷамъиятӣ, варзишгарони номвар ва низ хеле-хеле ҷавонони меҳнатдӯст ҳастанд, ки орому сарбаланд, кору зиндагӣ мекунанд (албатта шумора калаванда аст ва вобаста ба мавсимҳои кориву бекорӣ метавонад каму зиёд шавад).
Ҷамъияти тоҷикони шаҳри Красноярск яке аз аввалин диаспораҳои тоҷикони Русия ба ҳисоб меравад. Соли 1996 бо саъйу талошҳои як зумра тоҷикони баор, махсусан раҳбари кунунии он Ҳайдар Алимов Маркази милливу фарҳангии “Пайванд” - яке аз аввалин ҷамъиятҳои тоҷикони Федератсияи Русия таъсис ёфт. Баъди пошхӯрии Иттиҳоди Шӯравӣ ҳам нахустин шуда ҳамин Ҷамъияти тоҷикон Иди милии “Сайри лола”-ро дар шаҳри Красноярск ва умуман миқёси Русия ҷашн гирифт. Ин ид ҳамасола моҳи май бо иштироки тамоми тоҷикони шаҳри Красноярск ва дигар шаҳрҳои минтақаҳои Сибир, мисли Иркутск, Новосибирск, Якутия, Кемеров баргузор мешавад. Инчунин, даҳҳо миллатҳои ғайр ба Остров Татышева меоянд, то рақсу суруди миллӣ ва гуштингирии паҳлавонони тоҷикро тамошо кунанд. Дар ин рӯз қадрдонӣ аз меҳмонони олиқадр, паҳлавонони номвар ва донишҷӯёни фаъоли тоҷик ба ҳукми анъана даромадааст.
Ҷамъияти тоҷикон бо ҳокимияти иҷроияи маҳаллӣ робитаи хуби ҳамкорӣ дошта, зимни фаъолияти худ хадамоти зиёдеро ба нафъи ҳамватанони бурунмарзӣ анҷом додаст. Ҳамин аст, ки тоҷикони шаҳри Красноярск бо кору зиндагии муътадили худ аз эҳтироми мардуми таҳҷоӣ бархурдоранд. Иштироку ҳунарнамоии ҳамватанони мо дар Рӯзҳои фарҳангии Лаҳистон, 200 солагии шоири номвари укроинӣ - Тарас Шевченко, “Иди харбуза”-и узбекҳо, ҷашни миллии озариҳо ва чандин ҷашнвораҳои қавмӣ ва чорабиниҳои фарҳангӣ худ гувоҳ аст, ки ҳамгироии миллатҳо дар минтақаи Сибир тоза ба тарви солим шакл мегирад. Махсусан, пазироии гарм ва эътирофи расму анъанаҳои миллии тоҷикон аз ҷониби марудмони бумӣ ва омад хеле рӯшан эҳсос мешавад.
Дар “Рӯзи байналмилалии забони модарӣ” (Международный день родного языка), бозиҳои байнидонишгоҳиву байниавтономии шаҳр “Брейн-ринг”, Донишҷӯии бидуни марз (Студенчество безграниц) ва КВН донишҷӯёни тоҷик фаъолона иштирок ва аксаран ғолиби ин бозиҳо мешаванд.
Клуби вазишии “Сомон”-ро ҳамватанони мо таъсис доданд. Дар клуб аз рӯи намудҳои муҳорибаи омехта, самбо, ҷудо ва ғайра тамрин дода мешавад. Дар як муддати начандон зиёди фаъолият ин клуб чемпионҳои зиёди наврасро дар сатҳи шаҳр ва минтақа (край) муарифӣ кард. Хушҳолкунанда аст, ки аксари ҷавонони тоҷик дар Русия ба варзиш, махсусан муҳорибаҳои омехта алоқамандӣ доранд. Давлат Олимов яке аз паҳлавонони номдор ва қаҳрамони чандкаратаи Русия дар ин намуди варзиш аст. Ӯ дар сатҳи шаҳр ва кишвар борҳо барандаи мусобиқаҳо шудааст. Мардуми таҳҷоӣ аз ҳунари боло, маҳорат ва хислатҳои ҳамидаи ин паҳлавони тоҷик ҳамеша таъриф мекунанд.
“Восточная кухня”. Фаҳмидани он, ки ин ошхона аз Тоҷикон аст, чандон мушкил нест. Дар пештоқи ошхона баннери калоне бо навиштаҷоти “хӯрокҳои шарқӣ” ва як расми зебодухтари атласпӯш меҳмононро тоҷикона пешвоз мегирад. Ин ягона ошхона дар шаҳри Красноярск аст, ки қурутоб дорад ва ҳаммеҳанонро сари як пиёла чойи тоҷикӣ гоҳу ногоҳ ҷамъ меоварад. Дар ин ҷо ҷавонони мо аз дастоварду муваффақиятҳои якдигар огоҳ мешаванд. Барои баланд бардоштани номи тоҷику Тоҷикистон идеяҳои созандаро ба миён мегузоранд. Вохӯриҳои ояндаро барномарезӣ мекунанд ё рӯзи бозии футболу пейнтболро муайян месозанд. Ин ҷо як гӯшаи хурдакаки Ватан аст.
Дар ин ҳама табодули фарҳангӣ, бо дилпурӣ метавон гуфт, ки ҳамватанони мо ҳамчун ҳомиёну фарҳангу таърих ва посдорони нангу номуси тоҷикӣ рисолати худро бо амри виҷдон ва дар сатҳи зарурӣ анҷом медиҳанд. Тоҷикони шаҳри Красноярск ҳамеша бо ёди Тоҷикистони азизанд. Борҳо аз забонашон ин мисраъҳоро шунидаам:
Беватан нест ғарибе, ки кунад ёди Ватан,
Дар Ватан будаи бе ёди Ватан беватан аст…
Мӯҳр
Эзоҳ илова кунед
ХАБАРҲОИ ОХИРИН
Баҳси пурзӯр кардани ҳифзи сарҳади Тоҷикистону Афғонистон дар дидори Э.Раҳмон ва ҳайати парлумони Аврупо10:09Оғози фурӯши смартфонҳои iPhone 8 ва iPhone 8 Plus!09:49БО ЗАБОНИ ШЕЪР: Ман зи андешаи турконаи як ҳамватанам метарсам...15:34Чаро ҳукумат ҳамеша ба ТАЛКО имтиёз медиҳад?14:16“Шантаж”-и ҳамсар: Аз ҳаққи модарӣ даст накашӣ расвоят мекунам10:27Баҳси буҷа: Аз қарзи маош то қарзи хориҷӣ11:57Сарвазири Тоҷикистон бо Президенти Узбакистон мулоқот мекунад11:05Ҳимояти СММ аз cарбози тоҷики пайрави “Шоҳидони Яҳво”, ки либоси низомиро рад кард10:38АКС+ВИДЕО. Нахустин анҷумани маъюбони Тоҷикистон дар Душанбе11:51Маҷлис: Аз тағйироти кадрӣ то ваъдаи 80 мансабдор барои пулдиҳӣ аз кисаи худ15:46100 метр дуртар: Тамокукашӣ маҳдудтар шуд13:21Аз парвандаи Маҳмудов то муроҷиати ҷабрдидагони "7 бурҷ": Роҳкиро надорем (ВИДЕО)11:18Пешниҳоди журналисти тоҷик ба раҳбарони кишварҳои ҷаҳон: 2018-ро соли беяроқӣ эълон кунем!09:33Агентии зидди коррупсия гуфт, “Умед-88” ва Вазорати молия аз “Роғун” қарз гирифтаанд08:01Таърихи имрӯз: Мавлуд, ҷашн, санаҳои таърихӣ, дамои ҳаво, бозори арз07:44
АХБОРИ ҶОЛИБ
10:09, 04 ноябр 2017
ТАҚВИМ
| « Ноябр 2024 » | ||||||
|---|---|---|---|---|---|---|
| Душ | Сеш | Чор | Пан | Ҷум | Шан | Якш |
| 1 | 2 | 3 | ||||
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | |
