Рашид Олимов: Табиати Тоҷикистон чун миқнотис сайёҳонро ҷалб мекунад

Намоишгоҳи рассомони тоҷик дар осорхонаи Қасри императории Пекин ифтитоҳ шуд.

---

Тибқи иттилои вазорати умури хориҷа Рашид Олимов, сафири Тоҷикистон дар ҷумҳурии мардумии Чин меҳмононро хайра мақдам гуфта зикр сохт, ки унвони намоишгоҳ «Сеҳри кӯҳҳо ва гулҳо» буда, оид ба Тоҷикистон ва табиату манзараҳои он маълумот медиҳад. Дипломати тоҷик гуфт: «Тоҷикистон – сарзамини қадимест, ки тахайюлу тасаввуроти рассомро ба ваҷд меорад. Кӯҳҳои бузург, ки бар онҳо осмони кабуд такя мекунад; сабзазори алпӣ бо алафҳои зумуррадин ва гулҳои бошукӯҳ; кӯлҳои софи баландкӯҳҳо, ки дар онҳо ситораҳои қудсӣ, моҳи зарди дурахшон ва офтоби оҳангудоз инъикос меёбанд; боғҳои дилкушо, ки бо рангҳои баҳор пуртуғёнанд; водиҳои беканори зумуррадин бо обхезии лолаҳои суп-сурх, - ҳамаи ин чун миқнотис (магнит) мусаввиру наққошони ватанӣ ва хориҷиро ба худ ҷалб мекунад».

Гуфтанист, қисми зиёди намоишгоҳ расмҳои устоди нақшу нигор, рассоми халқии Тоҷикистон ва ИҶШС Сӯҳроб Қурбоновро ташкил медиҳад. Рашид Олимов тамоми ҳозирин ва меҳмонони сершуморро ба саёҳати ғоибона ба Тоҷикистон – кишвари кӯҳҳову гулҳои сеҳрнок даъват намуд. Муовини аввали мудири кулли Бюрои муносибатҳои байналмилалии фарҳангии Вазорати фарҳанги Хитой  Хю Ҷин Линг дар маросими ифтитоҳи намоишгоҳ баромад карда, тазаккур дод, ки «Хитой ва Тоҷикистон – кишварҳои дӯсти қарин ҳастанд, ки бо талошҳои муштарак комёбиҳои бузургро ба даст овардаанд, аз ҷумла, дар соҳаи ҳамкории фарҳангӣ. Тоҷикон, яке аз халқҳои қадимтарини Осиёи Марказӣ, дар дарёи тӯлонии таърихи инсоният ба ҷаҳон намунаҳои беҳтарини фарҳангро тӯҳфа кардаанд».

Манбаъ афзуд, дар маросими ифтитоҳи намоишгоҳ намояндагони вазоратҳои фарҳанг ва корҳои хориҷии Хитой, котиботи Созмони ҳамкории Шанхай, сафирон ва дипломатҳои кишварҳои дӯст, ходимони ҷамъиятӣ ва намояндагони васоити ахбори омма иштирок доштанд.{jathumbnail off}

Мӯҳр