29 дек 2014 16:18Тоҷикистон / Иқтисодӣ / Дидгоҳи хос

Иқлими мусоид Данғараро саноатӣ мекунад?

Эмомалӣ Раҳмон, раисиҷумҳури Тоҷикистон, 19 декабр, дар ноҳияи Данғара сохтмони бузургтарин маҷмааи коргоҳҳои нассоҷӣ дар Осиёи Марказиро оғоз бахшид.Корхонаи бунёдшаванда яке аз бузургтаринҳо дар Осиёи Марказӣ буда, дар марҳилаи аввал беш аз 52 000 тонна нахи пахтаро коркард мекунад.

Эмомалӣ Раҳмон дар оғози сохтмони коргоҳ изҳор доштааст, ин маҷмаа бо харҷи қариб 1,5 миллиард сомонӣ дар зарфи 2 соли оянда сохта ва пурра ба кор дароварда мешавад. Раисиҷумҳур қайд намудааст, ки сабаби асосии дар ноҳияи Данғара бунёд ёфтани ин маҷмаа иқлими мусоиди ин минтақа барои истеҳсоли навъҳои пахтаи дорои нахи дароз ва захираи аз ҳама зиёди заминҳои азхудшавандаи ҷумҳурӣ дар ин ноҳия мебошад. Бо таваҷҷуҳ ба ин “Озодагон” аз се коршинос пурсид:Иқлими мусоид Данғараро саноатӣ мекунад?

Зулфиқори Исмоилиён, коршиноси масоили иқтисодӣ

Тамоми Тоҷикистон иқлими якхела дорад. Дар тамоми ноҳияҳои Тоҷикистон мешавад корхонаҳои нассоҷиву полоиши нафт сохт. Сохтани ҳама гуна корхона имкон дорад. Вале Данғара минтақаи озоди иқтисодӣ эълон шудааст ва шояд барои беҳтару хубтар обод шудани он бошад. Чунки раисиҷумҳур ҳам аз ноҳияи Данғара аст. Дар зимн таъкид мекунам, ки корхонаи нассоҷиро метавон дар тамоми навоҳии ҷумҳурӣ сохт, шарт нест, ки фақат дар Данғара сохта шавад. Бунёди чунин корхонаҳои бузург дар ин минақа ба хотири он аст, ки Данғара минтиқаи озоди иқтисодӣ мебошад. Ба қавле ин минтақа имтиёзҳои бештар дорад, зеро нафаре, ки дар ин минтақа сармоягузорӣ мекунад, аз имтиёзҳои бештар баҳра мебарад. Масалан, вориди маводи хом ва дигар ашё бидуни пардохти молиёти гумрукӣ аст ва пардохти молиёт вуҷуд надорад. Шояд барои ин дар Данғара калонтарин корхонаи нассоҷӣ месозанд.

Табаралӣ Ғаниев, иқтисодшинос

Дар барномаи стратегии рушди иқтисодии ҷумҳурии Тоҷикистон Данғара минтақаи озоди иқтисодӣ интихоб шудааст. Ҳамчунин дар назар дошта мешавад, ки дар роҳи байни Чин ҷойгир аст ва имконоти дар оянда тиҷорат кардан ва рушд додани ин минтақа дар назар мебошад. Аз ин нуқтаи назар иқлими Дангғараро мусоид гуфт. Инчунин дар қонуни рушди иқтисод омилҳои объективӣ ва субъективӣ вуҷуд дорад, ки ҳар ду дар якҷоягӣ амал мекунанд. Шояд шумо омилҳои субъективиро дар назар доред. Мавҷудияти омилҳои субъективӣ ҳам аз имкон берун нест.

Ҳоҷимуҳаммад Умаров, иқтисодшинос

Ба ақидаи ман корхонаи нассоҷӣ бофандагӣ меҳнатталаб мебошад ва хуб мешуд агар ин корхонаро дар шаҳри Кӯлоб месохтанд. Чун дар Кӯлоб қувваи корӣ зиёд мебошад ва мутахассисони соҳаи кори саноат бештаранд. Аз ҷониби дигар Кӯлоб шаҳри саноатӣ буд ва ҳатто қабл аз инқилоб ҳам дар ин шаҳр саноати дастӣ фаъол буд. Бинобар ин фикр мекунам, ки агар занҳои Кӯлобро ба онҷо баранд ва шароити зиндагӣ барояшон муҳайё кунанд, ин корхона сармаранок кор мекунад. Зеро дар бунёди чунин корхонаҳо ва самаранок амал кардани онҳо будани қувваи корӣ нақши муҳим мебозад. Дар Данғара сатҳи қувваи корӣ паст аст.

Мӯҳр

Хабарҳои монанд:

Чи Ахмият дорад Шахрвандони Точикистон ба чои кор таъмин
Шавад. ин Хубаст.

Ҷавоб диҳед Иқтибос Шикоят

Абдухолиқ

Ман ба ақидаи Ҳоҷимуҳаммад Умаров сад дар сад рози буда, аз масъулини ҳукумат Эҳтиромона хоҳиш дорам, ки дар масъалаи ОБОДОНИЮ БУНЁДКОРӢи ҷумҳурӣ хуб мешуд, ки ба ШАҲРИ КӮЛОБ каме ҳам бошад имтиёз медоданд, баъзан корхонаҳову иншоотҳои аҳамияти иҷтимоиву иқтисодӣ доштаро дар шаҳри Кӯлоб ҳам месохтанд.

Ҷавоб диҳед Иқтибос Шикоят

Беном

Оё намешуд, ки корхонаи азими Душанбе, ки солҳои дароз бекор хобидааст "Текстилмаш" ва аллакай ҳамаи анборҳо корпусҳои корӣ мавҷуданд танҳо технологияи нав намерасид, ба кор андохта шавад. Боварӣ дорам, ки ин ҳам арзонтар мешуд ва ҳам қуллайтар.
Куҷо нигоҳ мекунанд?????

Ҷавоб диҳед Иқтибос Шикоят

Эзоҳ илова кунед