22 дек 2014 09:43Тоҷикистон / Дидгоҳи хос
Сафват Бурҳонов: “Видеоҳои антиҲНИТ тарҳи ФСБ аст”
Гуфтугӯи онлайнӣ бо Сафват Бурҳонов, журналист ва таҳилигари тоҷик, ки ҳоло дар Укроин қарор дорад. Бурҳонов ҳузури низомии Русия дар Укроинро таъйд карда, мегӯяд, Путин тарҳи Ғарб аст ва нақши Горбачевро бозӣ мекунад. Ӯ инчунин ситезиши дунявиҳо алайҳи исломиҳоро кори ФСБ-и Русия медонад ва муътақид аст, наворҳои антинаҳзатӣ аз ҷониби муздурони ин ниҳод таҳия мешаванд. Матни комили ин суҳбат ҳоло пешниҳоди шумо мегардад.
ПУТИН ҲАМ МИСЛИ ГОРБАЧЕВ “ПРОЕКТИ ҒАРБӢ” АСТ
Озодагон: Чанд вақт шуд, дар Укроин ба сар мебаред?
Сафват Бурҳонов: “Як сол аст дар Украина зиндагӣ мекунам. Украина як кишвари озода аст. Мардумонаш хеле бофарҳанганд”.
Озодагон: Назари коршиносон оид ба буҳрони Украина гуногун аст, яке Русияро ҳақ меҳисобад, дигаре Украина ва ҳампаймононашро. Ба назари Шумо кӣ ҳақ аст?
Сафват Бурҳонов: “Танҳо Худо метавонад мардумеро “ҳақ” ва “ботил” хонад. Он чи ман мебинам, ҳамин аст, ки мардуми Укроин бархостанд, то зиндагии худро аз фасоду дуздию вомондагӣ раҳо бахшанд. Ҳамсояи зӯргӯ артиш даровард, заминашонро гирифт, хонаҳояшонро сӯхт, фарзандонашонро кушт, ки “не, Укроин ҳам бояд мисли Русия кишвари дуздию фасод бошад”.
Озодагон: Русия ҳамеша рад мекунад, ки низомиёнаш дар Укроин ҳузур надоранд. Оё воқеият ҳамин аст?
Сафват Бурҳонов: “Русия гуфта дар Қрим ҳам аскар надорад. Пешвои ҷанги Донбас Гиркину Бородаю Безлер, афсарони амнияти рус ҳастанд. Артиши рус дар Укроин ҷангида истодааст. Инро аз дохил мебинем”.
Озодагон: Дар Укроин ҳоло вазъ чи гуна аст, манзурам гуруҳҳои сиёсӣ дар ин кишвар ҳама муттаҳиданд?
Сафват Бурҳонов: “Путин барои Укроин кори бузург кард. Ҳоло укроиниҳо он миллати парокандаи мисли соли пеш нестанд. Худшиносию меҳанпарастии укроиниҳо боло рафт ва имрӯз хеле муттаҳид шуданд. Аз русгароҳо, ки соли гузашта беш аз 80 дарсад дар ҳокимият буданд, ҳоло хеле кам мондаанд ва дигар дуздию фасод кардан наметавонанд”.
Озодагон: Ба назари Шумо Путин дар ин набард пирӯз шуд ё шикаст хӯрд?
Сафват Бурҳонов: “Намедонам чӣ кард, аммо мағзҳои сиёсии Ғарб беш аз 300 сол кӯшиш карданд, Укроину Белорусро аз паҳлӯи Русия ҷудо кунад, аммо натавонистанд. Шикастнопазирии Русия дар ҷангҳои ҷаҳонӣ аз он буд, ки ин ду миллат паҳлӯяш буданд. Путин орзӯи деринаи “гургони Ғарб”-ро пиёда кард. Путин ҳам мисли Горбачев “проекти ғарбӣ” аст. Ӯ СССР-ро пош дод, ин Русияро пош медиҳад”.
Озодагон: Бо кадом далел ӯро одами Ғарб ҳисоб мекунед, дар ҳоле ки мавзеи тундгараёнае нисбат ба Ғарб дорад?
Сафват Бурҳонов: “Сиёсат танҳо сухан нест. Кораш дигар аст”.
“ИҚТИСОД, СИЁСАТ, БОНК, АРТИШ ҲАМА ЗЕРИ ИДОРАИ МАСКАВ МЕБОШАД”
Озодагон: Бисёр раҳбарони Осиёи Миёна дар кор ва рафтор ба Путин тақлид мекунанд, шахсияти Путинро чи гуна арзёбӣ мекунед?
Сафват Бурҳонов: “Дар Осиёи Миёна давлат нест ва роҳбари давлат гуфтан нашояд. Ин гӯё давлатҳо устонҳои Русия ҳастанд ва бе иҷозати Маскав ҳеч коре кардан наметавонанд. Осиёи Миёна аз Маскав идора мешавад”.
Озодагон: Таҳримҳои Ғарб бар зидди Русия асари манфӣ ба иқтисоди Тоҷикистон гузашт ва вазъияти муҳоҷирон дар Русия вахимтар шудааст, дар ин хусус чи мегӯед?
Сафват Бурҳонов: “Вақте Тоҷикистон як устони Русия бошад, чӣ гуна метавонад аз хатари болои марказаш омада эмин бошад? Дер ё зуд ҳар чӣ дар Маскав шавад, дар мо такрор хоҳад шуд. Мо ягон системаи мустақил надорем. Иқтисод, сиёсат, бонк, артиш... ҳама зери идораи Маскав ҳастанд”.
Озодагон: Вазъи ояндаи Тоҷикистонро чи гуна мебинед, оё вазъият рӯз аз рӯз фавқуллодатар мешавад?
Сафват Бурҳонов: “Ҳарчанд хушбин ҳастам, аммо як сол пеш навишта будам, ки бояд омода шуд, ки имсол вазнин мешавад. Касе нашунид. Худо мегӯям, ки баҳор ба хушию хушвақтӣ биёяд. Ҳоло ҳарчанд вақт кам монд, аммо илоҷ ҳаст. Бояд баҳор барномаи ирригатсиониро пиёда кард. Ками кам як миллион гектар заминро бояд обӣ кард. Бозаргонии хурду миёна, истеҳсолоти хурдро аз дуздони давлатӣ озод бояд кард”.
АНДЕШАСИТЕЗӢ ДАР ХУНУ МЕНТАЛИТЕТИ ТОҶИК НЕСТ
Озодагон: Дар ҳафтаи ахир як бурхӯрд миёни дунявигароён ва исломгароён ба вуҷуд омад. Назари Шумо дар ин хусус чи аст? Чаро кормандони академияи улум бо лаҳни тунд ба Ислом ҳамла карданд?
Сафват Бурҳонов: “Онҳое, ки солҳои 80-у 90-ро ёд доранд, нағз медонанд, ки ин бозии Маскав аст. Тоҷикистон як бими марг дорад: муттаҳам кардан ба исломгароӣ. ФСБ бачаҳои моро Сурияву Ироқ бурда истодаст. Дар Афғонистон тарбият дорад. Ҳоло барои зери даст доштан, ин қартаро кушода истодаст”.
Озодагон: Манзур ин буд, ки ин падида, яъне ҳамала ба Ислом дар дохили Академияи улум зуҳур кард ва як мавқеъгирии шадидулаҳн доштанд, фикр мекунед ин кори дуруст буд?
Сафват Бурҳонов: “Ҳамлаи “исломиҳо” ба дунявиҳо, “атеистҳо” ба “исломиҳо”, видеоҳои антиҲНИТ..., инҳо тарҳҳои ФСБ ҳастанд, ки югурдакҳошон дар ниқобҳои гуногун пиёда мекунанд. Ин бозии Маскав бо дасти муздурони ватанӣ аст”.
Озодагон: Чаро фикр мекунед ин бозии ФСБ аст? Инҷо баҳси тоҷикон аст, ин 5 фоиз атеист худро тоҷик ҳисоб мекунад, магар ин тавр нест?
Сафват Бурҳонов: “Тоҷик миллион сол атеисту мазҳабӣ дошт ва ҳеч гоҳ бархӯрд намекарданд. Ҷанги андеша хоси Тоҷик нест. Барои Тоҷик ҳамеша андеша, фарҳанг, дину бовар кори шахсии ҳар кас ва дахлнопазир буду ҳаст. Агар ҷанги андешаро дидед, метавонед бе дудилагӣ чун унсури бегона шубҳа кунед ва баҳо диҳед. Андешаситезӣ дар хуну менталитети Тоҷик нест. Ин хосияти физиологии миллат аст. Касе ситезиши андеша дорад ё тоҷик нест ё гумоштаи каси дигар аст”.
Озодагон: Назари шахсии Шумо чи аст, оё ин тоифаи атеист ҳақ доранд, чунин мавқеъгирӣ намоянад?
Сафват Бурҳонов: “Ҳақ доранд! Андеша дар Тоҷик Озод аст! Чунин буд, ҳаст, мемонад. Ҳама ҷонибҳо ҳақ доранд, ки андешаи ҳамдигарро инкор кунанд. Ва ин инкорҳо баҳс ба вуҷуд меорад, ки илмро меофарад. Илм натиҷаи баҳс аст. Ё академикҳо корду автомат гирифта ба майдон баромаданд? Онҳо бо сухан инкор карданд, инҳо бо сухан исбот кунанд, мешавад баҳс ва шоҳид хулосаи дурусти илмӣ мегирад. Вақте академикҳо бо сухан инкор мекунанду муллоҳо бо автомат, шоҳид имонашро ба Ислом бой медиҳад. Вақте аргумент намонд, мушт боло мешавад”.
Озодагон: Ба назари Шумо дар ин шароит бархӯрди дунявиҳову исломиҳо бар манфиати мо аст? Чаро ин баҳсҳоро доман мезананд?
Сафват Бурҳонов: “Гуфтам, бархӯрдҳои беақлонаи мо ба манфиати душманони мо ҳастанд. Тоҷик се душмани таърихӣ дорад, ки пайваста пайи шикасташ ҳастанд ва инро ҳар Тоҷик бояд донад. Ва тӯли таърих хоинони миллат худро арабу муғулу рус гирифта, ба мо зарбаҳо мезананд, вале мо Ҳастем”.
Озодагон: Дар соли нави милодӣ ба мардуми тоҷик чӣ таманно доред?
Сафват Бурҳонов: “Тоҷик бояд Тоҷик бошад. Мардуми озодаю обод, мардуми пирӯзи шикастнопазир. Ҳеч мардуме дар дунё ҳамчун Тоҷик пешорӯи душманони сарсахт истодагарӣ накарда аст. Қутайба гузашт, Чингиз гузашт, Ленин гузашт, ин рӯзҳо ҳам мегузаранд!”.
Озодагон: Сипос барои суҳбат, муваффақ бошед!
Сафват Бурҳонов: “Барори кору зиндагӣ”. Мӯҳр
Эзоҳ илова кунед
ХАБАРҲОИ ОХИРИН
Баҳси пурзӯр кардани ҳифзи сарҳади Тоҷикистону Афғонистон дар дидори Э.Раҳмон ва ҳайати парлумони Аврупо10:09Оғози фурӯши смартфонҳои iPhone 8 ва iPhone 8 Plus!09:49БО ЗАБОНИ ШЕЪР: Ман зи андешаи турконаи як ҳамватанам метарсам...15:34Чаро ҳукумат ҳамеша ба ТАЛКО имтиёз медиҳад?14:16“Шантаж”-и ҳамсар: Аз ҳаққи модарӣ даст накашӣ расвоят мекунам10:27Баҳси буҷа: Аз қарзи маош то қарзи хориҷӣ11:57Сарвазири Тоҷикистон бо Президенти Узбакистон мулоқот мекунад11:05Ҳимояти СММ аз cарбози тоҷики пайрави “Шоҳидони Яҳво”, ки либоси низомиро рад кард10:38АКС+ВИДЕО. Нахустин анҷумани маъюбони Тоҷикистон дар Душанбе11:51Маҷлис: Аз тағйироти кадрӣ то ваъдаи 80 мансабдор барои пулдиҳӣ аз кисаи худ15:46100 метр дуртар: Тамокукашӣ маҳдудтар шуд13:21Аз парвандаи Маҳмудов то муроҷиати ҷабрдидагони "7 бурҷ": Роҳкиро надорем (ВИДЕО)11:18Пешниҳоди журналисти тоҷик ба раҳбарони кишварҳои ҷаҳон: 2018-ро соли беяроқӣ эълон кунем!09:33Агентии зидди коррупсия гуфт, “Умед-88” ва Вазорати молия аз “Роғун” қарз гирифтаанд08:01Таърихи имрӯз: Мавлуд, ҷашн, санаҳои таърихӣ, дамои ҳаво, бозори арз07:44
АХБОРИ ҶОЛИБ
10:09, 04 ноябр 2017
ТАҚВИМ
| « Ноябр 2024 » | ||||||
|---|---|---|---|---|---|---|
| Душ | Сеш | Чор | Пан | Ҷум | Шан | Якш |
| 1 | 2 | 3 | ||||
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | |
