13 ноя 2014 15:20Тоҷикистон / Сиёсат

Песков “беодобӣ”-и Путин нисбат ба зани Ҷинпинро шарҳ дод (ВИДЕО)

Дмитрий Песков, сухангӯи Владимир Путин, раисиҷумҳури Русия “ғамхорӣ”-ии раисашро дар ҳаққи зани Син Ҷинпин, раисиҷумҳури Чин, ки тибқи анъанаҳои ин мамлакат беодобист, шарҳ дод.

“Анъана бошад набошад, зан бошад набошад, ки хунук ҳама як хел мехӯранд. Он, ки Путин зани Син Ҷинпинро ба рӯймол печонд, як амали муқаррарист, ки ба ҷояш ба фикрам ҳар каси дигар ҳам чунин мекард. Дигараш-ҳама муҳокимаю баҳсҳои бефоидаанд, ки аз сафсатаю ёвагӯӣ беш нестанд.”-гуфтааст Песков ба расонаҳои Русия.

Ба гуфтаи Песков он ҳангомае, ки гирди амали Путин нисбати зани Ҷинпин дар Русия аст, дар фазои иттилоотии кишварҳои дигар вуҷуд надорад.

Владимир Путин, раисиҷумҳури Русия шоми 10-уми ноябр, вақте Син Ҷинпин, раисиҷумҳури Чин машғули суҳбат бо ҳамтои амрикоияш, Барак Обама будааст, ба нияти гарм кардани ҳамсари Син Ҷинпин ӯро ба рӯймол печондааст, ки тибқи арзишҳои чинӣ беодобии бузург аст. Ин ҳолат шоми 10-уми ноябр, вақте иштирокдорони ҳамоиши "Ҳамкории иқтисодии Осиё ва уқёнуси Ором" ё худ АТЭС барои тамошои оташбозӣ ба варзишгоҳи олимпии Пекин ҷамъ омада буданд, сурат гирифтааст. Расонаҳо менависанд, ҳаво шоми 10-уми ноябр дар Пекин салқин буд ва Путин ҳамсари Син Ҷинпинро бо рӯймол печонд. Аммо ҳамсари раисиҷумҳури Чин ҳамагӣ баъди чанд лаҳза рӯймолро гирифта, либоси ғафсро аз дасти муҳофиз гирифта ба бар намуд.

Ин ғамхории Путин аз рӯи фаҳмишу арзишҳои чинӣ як беодобӣ маҳсуб меёбад, зеро тибқи анъанаҳои чинӣ марди бегона дар ягон ҳолат ҳаққи расидан ба занро надорад. Телевизионҳои марказии давлатии Чин ин ҳолатро ба навор гирифта, чанд бор намоиш додаанд, аммо баъди нороҳатии мансабдорони воломақоми чинӣ наворро пурра ҳазф намудаанд.