13 ноя 2014 09:54Тоҷикистон / Дидгоҳи хос / Тема дня

ВКД: Ягон пагондор Музаффароваро пуштибонӣ намекунад (ВИДЕО)

Вазорати умури дохилии Тоҷикистон (ВУД) бо пахши як иттилоия гуфтааст, Наргис Музаффарова, як соҳибкорзани Душанбе дар ин ниҳод, аз ҷумла Воҳиди махсуси он пуштибоне надорад ва ҳамаи қонуншиканиҳояш тибқи қонун тафтиш шудаанд.

Тибқи иттилоияи ВУД қонуншиканию ҷиноятҳои Наргис Музафарова, сокини 38-солаи кӯчаи Исмоили Сомонии шаҳри Душанбе тибқи меъёрҳои қонун ва холисона мавриди санҷиш ва тафтиш қарор гирифта, маводи дахлдор барои баррасӣ ба Додситони ноҳияи Исмоили Сомонӣ фиристода шудаанд. Ба иттилои манбаъ, додситони ноҳияи Исмоили Сомонӣ моҳи августи соли равон алайҳи Музаффарова бо иттиҳоми вайрон намудани қоидаҳои ҳаракати роҳ, авбошӣ ва зӯроварӣ нисбат ба намояндаи ҳокимият парвандаи ҷиноӣ боз намуда, ба додгоҳи ноҳияи Исмоили Сомонӣ ирсол кардааст: “Дар мурофиаи судӣ судшаванда Музафарова худашро дар содир намудани маҷмӯи ҷиноятҳо аз рӯи айбҳои эълоншуда пурра гунаҳкор шуморида, аз суд хоҳиш намуд, ки бо татбиқи Қонуни Ҷумҳурии Тоҷикистон "Дар бораи авф" пешбурди парванда нисбаташ қатъ карда шавад".

Вазорати умури дохилии Тоҷикистон мегӯяд, бо назардошти он ки ҷиноятҳо то қабул шудани қонун дар бораи афв содир шудаанд, додгоҳ қарор кардааст, ки парванда алайҳи Музаффарова қатъ шавад. Дар иттилоия омадааст, тибқи қонун авф афроде, ки аз беэҳтиётӣ ҷиноят содир намудаанд ва нисбати шахсоне, ки қасдан ҷиноятҳои начандон вазнин ва дараҷаи миёна содир намудаанд, пешбурди парвандаҳои ҷиноятӣ, ки таҳти баррасии судӣ қарор доранд, қатъ мешавад.

Ин иттилоияи ВКД дар посух ба матлаби ҳафтаномаи “Нигоҳ” нашр шуд, ки аз қонуншикании соҳибкор, Музаффарова дар Душанбе нақл мекард. Ба иттилои нашрия Музаффарова, молики фурӯшгоҳи “Элита” дар маркази Душанбе, савори мошин “БМВ Х6” дар бисёри ҳолатҳо худсарию қонуншиканӣ карда, бемуҷозот мондааст. Дар матлаб аз қавли ҷабрдидаю шоҳидон оварда шудааст, ки Музаффарова писари ноболиғи Шуҳрат Абдуҳомидов, корманди мағозаи “For Men”-и маркази Душанберо барои он ки падараш мошини худро дар назди мағозаи Элита мондааст, латукӯб намуда, ба рӯи Абдуҳомидов, ки ба кӯмаки писараш шитофтааст, туф ва баъдан чандин дашноми дигари қабеҳ додааст. Инчунин нақзи қоидаҳои ҳаракати роҳ, зӯроварӣ нисбат ба пулис зикр шуда, таъкид гардидааст, эҳтимол ба далели пуштибон дар мақомот беҷазо мемонад.

Яке аз қонуншиканиҳои Музаффарова ба гузориши барномаи шабакаи аввали телевизиони давлатии Тоҷикистон низ роҳ ёфтааст: