28 окт 2014 10:05Тоҷикистон / Фарҳангу адаб

Ҳамоиши тоҷикистониён дар Теҳрон барои бузургдошти Мир Сайид Алии Ҳамадонӣ

Бахшида ба 700-солагии зодрӯзи Мир Сайид Алии Ҳамадонӣ, мутафаккир, шоир ва олими барҷастаи форсу тоҷик дар шаҳри Теҳрон - пойтахти Эрон ҳамоиши байналмилалӣ баргузор гардид.

Ин ҳамоиш, ки бо талош ва ибтикори Сафорати Тоҷикистон дар Эрон роҳандозӣ гардид, бо иштироки намояндагони корпусҳои дипломатӣ ва созмонҳои байналмилалӣ, фарҳангиён ва донишмандон сурат пазируфт. Ҳамоиш бо садо додани Суруди миллии Тоҷикистон оғоз шуда, баъд аз намоиши навори видеоие аз оромгоҳи ин орифи шинохта дар шаҳри Кӯлоб, Абӯзари Иброҳимии Туркмон - раиси Созмони фарҳангии ҶИЭ, Неъматулло Эмомзода - сафири Тоҷикистон дар Теҳрон, профессор Ифтихор Ҳусейн Ориф - раиси Муассисаи фарҳангии СҲИ (ЭКО), Саидободӣ - мудири кулли минтақаии ЮНЕСКО, Муҷтаҳиди Шабистарӣ - раиси Анҷумани дӯстии Эрон ва Тоҷикистон дар бораи ҷойгоҳ ва мақоми ин шахсияти илмӣ ва фарҳангӣ суханронӣ кардаанд.

Сафири Тоҷикистон дар Теҳрон зимни суханронии худ аз эҳтироми хоссаи сокинони кишвар нисбат ба Мир Сайид Алии Ҳамадонӣ ёдовар шуда, гуфтааст, ҳатто яке аз ашъори ӯро тоҷикистониён дар рӯи пули миллии худ ҷой додаанд:
“Ҳар кӣ моро ёд кард, Эзид мар - ӯро ёр бод,
Ҳар кӣ моро хор кард, аз умр бархурдор бод.
Ҳар кӣ андар роҳи мо хоре фиканд аз душманӣ,
Ҳар гуле к-аз боғи васлаш бишкуфад, бехор бод.
Дар ду олам нест моро бо касе гарду ғубор,
Ҳар кӣ моро ранҷа дорад, роҳаташ бисёр бод".

Эмомзода гуфтааст, ҳоло дар хазинаи Институти Ховаршиносии Тоҷикистон 52 асар аз Мир Сайид Алии Ҳамадонӣ маҳфуз аст ва бештари онҳо бо ҳуруфи сириллик баргардон шудаанд. Ба гуфтаи сафири кишвар дар Теҳрон соли 2015 Тоҷикистон бахшида ба бузургдошти ин шоири шинохтаи худ ҳамоиши байналмилалие баргузор хоҳад кард.

Мӯҳр

Хабарҳои монанд: