19 сен 2014 11:13Тоҷикистон / Иҷтимоӣ / Тема дня

Шарифзод дар қайди махсуси ВКД: Нашъаманд ва фурӯшанда, на санъаткор

Вазорати умури дохилии Тоҷикистон дар пасманзари нашри хабарҳо дар мавриди боздошти сарояндаи попи тоҷик - Қаҳрамони Шарифзод дар минтақаи Перми Русия, бо нашри як иттилоия гуфтааст, Шарифзод дар ин ниҳод ҳамчун истеъмолкунанда ва фурӯшандаи маводи мухаддир сабт шудааст.

Тибқи иттилои дафтари матбуоти Вазорати умури дохилӣ Қаҳрамони Шарифзод, зода ва истиқоматкунандаи ноҳияи Ҷалолиддини Румӣ буда, дар қайдҳои махсуси Вазорати корҳои дохилии Тоҷикистон ҳамчун истеъмолкунанда ва фурӯшандаи маводи махаддир мегузарад. Ин ниҳод таъкид мекунад, номбурда ба санъати тоҷик ягон муносибат надорад.

Ин дар ҳолест, ки Хадамоти федеролии назорати маводи мухаддир дар Русия рӯзи 17 сентябр аз боздошти як сарояндаи попи тоҷик дар Перм хабар дод, ки ба гуфтаи ин ниҳод ба "нашъаҷаллобӣ дар ҳаҷми калон" машғул будааст. Ҳарчанд, хадамот аз ин сароянда ном набурдааст, аммо бархе манобеъ аз Тоҷикистон ва мақомоти тоҷик ҳам таъйид карданд, ки ӯ Қаҳрамони Шарифзод аст.

Ба иттилои дафтари матбуотии Хадамоти федеролии назорати маводи нашъадори Русия, аз боздоштшуда дар маҷмӯъ ҳудуди ним кило ҳероин ёфт ва мусодира гардидааст. Манбаъ меафзояд, дастгиршуда аз 3 моҳи пеш ба Перм омада, аснои бозпурсӣ гуфта, ин ҷо барои таҳияи клипи наваш омадааст.

Дафтари матбуоти ин ниҳод тасдиқ мекунад, ки зимни муаянсозии шахсияти боздоштшуда, маълум гардид, ӯ дар Тоҷикистон ба сарояндагӣ машғул буда, ҳатто дар барномаҳои солинавии телевизионҳои давлатӣ иштирок кардааст. Қаҳрамони Шарифзод ҳарчанд дар раддаи аввали овозхонҳои попи тоҷик қарор надорад, аммо сурудҳои "Ориёӣ", "Вақте танҳоям", "Модар", "Ватан", "Ғарибӣ", "Нозанин" ва "Оре"-и ӯ миёни шунавандаҳо маъруф аст. Клипҳои ӯ дар дискфурӯшиҳо мавҷуд буда, дар интернет ҳам зиёд ба чашм мехӯрад. Дар гузориши телевизионие, ки шабакаҳои русӣ намоиш додаанд, як пора аз клипи "Оре" пахш шудааст.