10 сен 2014 10:13Хабарҳои ҷаҳон

Тақозои имом-хатиб аз раисҷумҳури Эрон барои бунёди масҷиди аҳли суннат

Мавлоно Абдулҳамиди Исмоилзиҳӣ, имом-хатиби масҷиди Маккии Зоҳидон дар дидор бо Ҳасан Руҳонӣ, раиси ҷумҳури Эрон хостори бунёди масоҷид барои аҳли суннат дар ин кишвар шудааст.

Исмоилзиҳӣ ва Ҳасан Руҳонӣ дар шаҳри Сиистони Эрон бо ҳам мулоқот кардаанд ва Мавлоно Абдулҳамид аз раиси ҷумҳур дархост кардааст, аз ҳисоби давлат дар шаҳрҳои Теҳрон ва Қум барои аҳли суннат ду масҷид бунёд карда шавад. Ӯ инчунин пардохт шудани хазинаҳои Мадрасаи дорулулум ва масҷиди Маккии Зоҳидон аз сӯи давлатро низ дархост кардааст. Бино ба иттилои расонаҳо, Ҳасани Руҳонӣ ба ёварони худ оид ба умури ақаллиятҳои кишвар барои иҷрои дархостҳои Исмоилзиҳӣ дастур дода, аз бархе мақомот хостааст, ба ҳарфҳои имом-хатиби масҷиди Маккии Зоҳидон диққати ҷиддӣ диҳанд.

Мавлоно Абдулҳамиди Исмоилзиҳӣ яке аз руҳониёни маъруфи олами Ислом ба шумор рафта, имом-хатибии масҷиди аҳли суннат дар шаҳри Зоҳидони Эронро бар душ дорад. Ӯ ахиран аз ҷониби мақомоти Ҷумҳурии Исломии Эрон мамнуъулхуруҷ шуда буд. Ин тасмим дар ҳоле гирифта шуд, ки Мавлоно Абдулаҳмид субҳи 18 июли соли ҷорӣ барои иштирок дар конфронси байналмилалие таҳти унвони “Таваҷҷуҳи уламои ҷаҳони Ислом барои ниҳодина кардани сулҳ, эътидол ва ақли солим” озими Туркия буд. Пештар аз ин низ, Ҷумҳурии исломӣ аз сафари Мавлоно Абдулҳамид барои ширкат дар “Анҷумани ҷаҳони Ислом” дар Арабистони Саудӣ ва конфронси уламои исломӣ дар Африқои Ҷанубӣ мамониат пеш оварда буд. Ҳарчанд баъди рӯи кор омадани давлати Ҳасани Руҳонӣ гузарномаи ӯро пас доданд, аммо ҳоло дигарбора мамнуъулхуруҷаш кардаанд.

Моро ҳамроҳӣ кунед:
Дар ФЕЙСБУК (FACEBOOK)
Дар ЮТЮБ (YOUTUBE)

Мӯҳр

Хабарҳои монанд: