20 авг 2014 17:31Оcиёи Марказӣ / Тоҷикистон

Умеди Эмомалӣ Раҳмон аз рушди футбол дар Тоҷикистон

Эмомалӣ Раҳмон, раиси ҷумҳури Тоҷикистон, дар ҷараёни сафараш ба вилояти Суғд як толори бузург, варзишгоҳи олимпӣ ва чанд иншооти навро мавриди баҳрабардорӣ қарор додааст. Дафтари матбуоти раёсати ҷумҳури Тоҷикистон мегӯяд, оқои Раҳмон таъкид кардааст, толору варзишгоҳ “туҳфаи арзишманде ба ҷавонону наврасони варзишгар дар соли футболи оммавӣ мебошад”.

Ба қавли манбаъ, масоҳати умумии толори варзишӣ, ки дар шаҳри Қайроққум ба истифода дода шуд, 1 ҳзаору 800 метри мураббаъ буда, баландиаш 18 метр мебошад. Ин толор барои гузарондани машқҳои таълимӣ ва мусобиқаҳои варзишӣ аз рӯи намудҳои баскетбол, волейбол, футболи толорӣ, кӯҳнавардӣ ва тенниси рӯи миз мувофиқ будааст.

Раиси ҷумҳури Тоҷикистон ба ҳар як навраси футболбоз тӯб тақдим карда, изҳори боварӣ намудааст, дар самти футбол Тоҷикистон метавонад оянда рушди назаррас дошта бошад: “Зеро барои ин кор дар ҳамаи гӯшаю канори ҷумҳурӣ шароити зарурӣ муҳайё мегардад ва ҷавонону наврасони мо ба он шавқу рағбати беандоза доранд”. Дафтари матбуоти раёсати ҷумҳурӣ мегӯяд, бо ширкати Эмомалӣ Раҳмон дар мавзеи «Рухак»-и Ҷамоати деҳоти Ғозиёни ноҳияи Бобоҷон Ғафуров корхонаи «Таҷ-Роуд» низ ба кор дароварда шудааст. Ин корхона, ки ба истеҳсоли сангу шағал ва асфалт машғул мебошад, аз ҷониби соҳибкор Қурбонмурод ва Баҳриддин Неъматовҳо дар заминаи ҶДММ “Сомонроҳ” бунёд ёфтааст.

Ба иттилои манбаъ, дар шаҳри Чкалов, ки яке аз марказҳои бузурги саноатии вилояти Суғд ба шумор меравад, бо иштироки оқои Раҳмон корхонаи аввалини нави «Элегант» доир ба истеҳсоли нах ва ришта аз сангҳои вулканӣ мавриди истифода қарор гирифтааст. Раиси ҷумҳури Тоҷикистон субҳи 20 август ба вилояти Суғд рафт ва сафараш ба шимоли кишварро аз ифтитоҳи як меҳмонхона дар Чкалов оғоз бахшид. Меҳмонхонаи “Сипеҳр”, ки аз сӯи соҳибкор Фазлиддин Ҳасанов бунёд ёфтааст, аз 3 ошёна иборат мебошад. Дафтари матбуоти раёсати ҷумҳури Тоҷикистон ҳадафи сафари Эмомалӣ Раҳмон ба Суғдро ошноии бевоситаи ӯ “бо вазъи зиндагии мардум ва бо рафти корҳои созандагию бунёдкорӣ” арзёбӣ намуда буд.

Мӯҳр

Хабарҳои монанд: