22 июл 2014 14:26Тоҷикистон / Иқтисодӣ

ВКД дар бораи сӯхтори маркази тиҷории "Шаҳбоз" дар бозори Саховати Кӯлоб

Мақомоти Вазорати умури дохилии Тоҷикистон раҳбарияти маркази савдои “Шаҳбоз”-ро, ки дар ҳудуди бозори “Саховат”-и Кӯлоб воқеъ аст, дар сӯхтори нимашаби 22 июл муқассир медонанд. Ба гуфтаи онҳо, ин сӯхтор дар ҳоле рух дода, ки борҳо барои пешгирӣ аз чунин вазъ ба раҳбарияти маркази савдо “маслиҳат”-ҳо дода будаанд.

Бар асоси иттилоияе, ки Вазорати умури дохилӣ дар шарҳи сӯхтори бозори “Саховат” нашр кард, нисбат ба Рашид Ризоев, раҳбари маркази тиҷории “Шаҳбоз”, моҳи январи соли ҷорӣ “барои вайрон ва иҷро накардани чорабиниҳои бехатарии зидди сӯхтор протоколи ҳуқуқвайронкунии маъмурӣ тартиб дода, ба маблағи 600 сомонӣ ҷаримабандӣ карда шудааст”.

“Инчунин, нисбат ба 10 соҳибкори маркази савдои “Шаҳбоз” протоколҳои маъмурӣ тартиб ва ба маблағи 1200 сомонӣ ҷаримабандӣ шуда, 1 нуқтаи савдо ва 4 нуқтаи барқие, ки хавфи сар задани сӯхторро доштанд аз манбаи барқ ҷудо карда шудааст”,-омадааст дар иттилоияи ВКД.

Дафтари матбуоти Вазорати умури дохилии Тоҷикистон мегӯяд, барои хомӯш намудани сӯхтори нимашаби 22 июл дар маркази савдои “Шаҳбоз” 18 мошини оташнишонӣ, 2 мотопомпаҳои қисмҳои оташнишонии шаҳру ноҳияҳои минтақаи Кӯлоб ва 4 мошинҳои обкаши шаҳри Кӯлоб сафарбар шудаанд. Ба иттилои манбаъ, масоҳати умумии сӯхтор 965 метри мураббаъ будааст, ки беш аз 90 нуқтаи савдоро фаро мегирад. “Сабаби сӯхтор расиши кӯтоҳи ноқилҳои барқӣ дар мағозаи маркази савдои “Шаҳбоз” мебошад. Зарар аз сӯхтор муайян карда мешавад”,-омадааст дар иттилоияи ВКД.

Давоми 7 моҳи охир ин бори дуюм аст, дар ин бозор сухтор ба амал меояд. Ибтидои моҳи январи соли ҷорӣ низ қисми зиёди ин бозори шаҳри Кӯлоб ба коми оташ рафта буд. Он замон ҳукумати шаҳри Кулоб сабаби ба амал омадани сухторро расиши ноқилҳо дар яке аз нуқтаҳои фурӯш арзёбӣ карда буд. Дар пайи сухтори моҳи январи соли ҷорӣ 96 мағоза ва 382 нуқтаи савдо зиён дида, ба 668 соҳибкори бозори “Саховат” дар ҳаҷми 2,8 миллион сомонӣ зарар расондааст. Баъди ду моҳи пас аз сӯхтор бо харҷи 3 миллион маблағи “Тоҷикматлубот” таъмиру навсозӣ шуда, мавриди баҳрабардорӣ қарор гирифта буд.

Мӯҳр

Хабарҳои монанд: