10 июл 2014 13:27Тоҷикистон / Сиёсат

“Дар саффи мақомот ҳанӯз шахсони тасодуфӣ ва ғайрикасбӣ ҳастанд”

Раиси ҷумҳури Тоҷикистон дар суханронии худ дар маҷлиси васеи ҳайати мушовараи Додситонии кулли Тоҷикистон аз вуҷуди шахсони тасодуфӣ ва ғайрикасбӣ дар сафҳои мақомот нигаронӣ кард. Эмомалӣ Раҳмон ин ҳарфҳоро рӯзи 10 июл, ҳангоми баршумурдани парвандаҳои ҷиноӣ алайҳи кормандони мақомоти қудратӣ баён дошт.

Ӯ гуфт, аз соли 2010 то кунун нисбат ба 1 ҳазору 211 корманди мақомоти ҳифзи ҳуқуқ ва сохторҳои низомӣ парвандаи ҷиноӣ оғоз ва тафтиш шудааст. Аз ин ҳисоб, ба гуфтаи раиси ҷумҳур, ба Вазорати умури дохилӣ - 406 нафар, Кумитаи давлатии амнияти миллӣ - 112, Сарраёсати Қӯшунҳои сарҳадӣ - 170, Вазорати дифоъ - 261, Гвардияи миллӣ - 34, Кумитаи ҳолатҳои фавқулода ва мудофиаи гражданӣ - 20, Агентии назорати маводи нашъаовар - 11, Агентии назорати давлатии молиявӣ ва мубориза бо коррупсия - 6, Вазорати адлия - 28, прокуратура - 18, судҳо - 32, мақомоти андоз - 77 ва Хадамоти гумрук 69 нафар рост меояд.

Инчунин, ба қавли Эмомалӣ Раҳмон, аз соли 2010 то имрӯз 58 корманди мақомоти ҳифзи ҳуқуқ барои даст доштан ба муомилоти ғайриқонунии маводи мухаддир дастгир ва ба ҷавобгарӣ кашида шудаанд. “Маълум мешавад, фаъолияти роҳбарони мақомоти ҳифзи ҳуқуқ ва сохторҳои низомӣ доир ба тарбияи кадрҳо, баланд бардоштани сатҳи касбии кормандон ва аз рӯи технологияҳои пешрафтаи кадрӣ интихобу ҷобаҷо кардани онҳо ҳанӯз ба талабот ҷавобгӯ нест”,-таъкид дошт раиси ҷумҳур.

Дар ҳоле ки ба таъкид ҷаноби Раҳмон, “мардум ба фаъолияти давлат мувофиқи рафтору кирдори кормандони прокуратура ва дигар мақомоти ҳифзи ҳуқуқ, садоқати онҳо ба Ватан ва давлату миллат, поквиҷдонӣ, сатҳи касбиву салоҳият ва маърифатнокиашон баҳо медиҳанд. Яъне ҳар қадаре, ки мардум ба шаффофияти фаъолияти мақомоти ҳифзи ҳуқуқ эътимод дошта бошанд, қудрату тавоноии давлат ҳамон қадар зиёд гардида, адолати иҷтимоӣ ва зиндагии орому осоиштаи сокинони мамлакат таъмин мегардад”.

Дар идома Эмомалӣ Раҳмон ба кормандони мақомоти ҳифзи ҳуқуқ ва қудратӣ гуфт, “ман ба ҳар яки шумо бовар карда, роҳбарии ин ё он соҳаро ба зиммаатон гузоштаам. Яъне, ман ҳамчун роҳбари давлат ва кафили Конститутсия ва ҳар яки шумо ҳамчун роҳбари ин ё он сохтору мақомоти давлатӣ дар назди халқи азизи кишвар масъулияти баробар дорем. Фаромӯш накунед, ки иҷрои ин масъулият аз ҳар кадоми мо заҳмати шабонарӯзӣ, фаъолияти содиқонаву софдилона ва муҳимтар аз ҳама, поквиҷдонӣ, дасту дили пок, нияти нек, азму иродаи қавӣ, садоқат ба Ватан, миллат ва давлат, инчунин аз ҳама гуна манфиат боло гузоштани манфиатҳои милливу давлатӣ ва суботу оромии кишварро мехоҳад”.

Мӯҳр

Хабарҳои монанд: