09 июн 2014 15:34Тоҷикистон / Иқтисодӣ

Eurasianet: Тайёраҳои “Сомон Эйр” аз ҳисоби ТАЛКО харидорӣ шудаанд

Расонаи хабарии “Eurasianet.org” бо такя ба асноди дастраскардаи ширкати русии “РусАЛ” рӯзи 9 июн иттилоъ дод, ки ҳавопаймоҳои ширкати “Сомон Эйр” бо пули корхонаи алюминиюми Тоҷикистон -ТАЛКО харидорӣ шудаанд.

Ин расона менависад, бо қарори додгоҳи Ню-Йорк аввали соли равон ширкати РусАЛ ба ҳуҷҷатҳое дастрасӣ пайдо кард, ки тибқи онҳо ҳудуди 100 миллион доллар даромади корхонаи давлатии ТАЛКО барои харидории ду Боинги 737 барои ширкати хусусии “Сомон Эйр” равона шудааст. Ин расона мегӯяд, интиқоли маблағ аз суратҳисоби “CDH Investments Corporation” аз моҳи июли соли 2008 то ноябри соли 2010 сурат гирифтааст.

“CDH Investments Corporation” ширкати миёнарав миёни ТАЛКО ва харидорони алюмний арзёбӣ мешавад, аммо ба гуфтаи масъулони ТАЛКО онҳо феълан бо ин ширкат иртиботе надоранд. Ин дар ҳолест, ки “Eurasianet.org” навиштааст, “CDH Investments Corporation” чун ТАЛКО ва “Сомон Эйр” аз ҷониби як шахс -- Ҳасан Асадуллозода, раиси “Ориёнбонк” назорат мешудааст.

Дар тасдиқи ин гуфтаҳо “Eurasianet.org” иттилоияҳои махфии собиқ сафири Амрико дар Тоҷикистон Кеннет Гроссро овардааст, ки аз ҷониби Викиликс ифшо шуданд. Гросс дар ин иттилоияҳояш навиштааст, “Сомон Эйр” аз ҷониби Асадуллозода назорат мешавад. “Eurasianet.org” меафзояд, “Ориёнбонк” ва “Сомон Эйр” ба дархостҳои ин расона барои шарҳи қазия, аз ҷумла харидории ду Боинг ҷавоб надодааст.

Игор Сатторов, масъули робита бо ҷомеаи ТАЛКО ба “Eurasianet.org” аз ҳисоби ин ширкати давлатӣ харидорӣ шудани Боингҳоро барои “Сомон Эйр” рад кардааст. Ӯ изҳор доштааст, ки CDH, собиқ шарики ТАЛКО буда, феълан ҳеч иртиботе надоранд. Аммо ба навиштаи “Eurasianet.org” додгоҳи федералии Иёлоти Муттаҳида миёни ТАЛКО ва CDH равобити зич пайдо намуда, ба Русал ҳаққи дастрасӣ ба ҳуҷҷатҳои бонкии CDH-ро додааст. Ин расона аз қавли манбаи муътамадаш дар РусАЛ менависад, феълан вакилони ин ширкат ба омӯзиши ҳуҷҷатҳо машғул буда, интизор доранд, ки метавонанд, асрори зиёди марбут ба ТАЛКО-ро оммавӣ кунанд.

Масъулони РусАЛ изҳор доштаанд, ки аз иқдом зидди ТАЛКО барнамегарданд, аммо коршиносон мегӯянд, ин кор то замоне идома хоҳад кард, ки Кремл барои ақибнишинӣ дастур надиҳад. Инчунин, коршиносон таъкид мекунанд, Кремл метавонад, ин ҳолатро чун фишанги зидди Душанбе истифода кунад.

Ин дар ҳолест, ки қаблан РусАЛ, яке аз ширкатҳои бузурги тавлидкунандаи алюминий дар ҷаҳон, бо пахши иттилоияе гуфт, Додгоҳи олии Ҷазираҳои Вирҷинияи Бритониё ба нафъи зерширкати РусАЛ - "Albaco" қарор бароварда, ҳукм кардааст, ки корпоратсияи сармоягузории СDH, шарики Талко, барои нақзи қарордод зимни интиқоли хокаи алюминий 70 миллион доллар ҷуброн пардозад. Дар иттилоия омада буд, ки ин қарор марбут ба таъмини хокаи алюминий барои Талко, корхонаи алюминийи Тоҷикистон аст, ки қаблан чун ТадАЗ маъруф будааст. РусАЛ мегӯяд, қаблан чунин қарорро Додгоҳи Швейтсария баровард, вале CDH, шарики Талко, иҷрои онро ба таъхир андохтааст.

Ин ширкати русиягӣ ҳушдор дода буд, дар сурати иҷро нашудани ҳукми додгоҳ аз роҳҳои дигари қонунӣ истифода карда, ҳатто имкон дорад, барои муфлис ё варшикаста эълон кардани корпоратсияи сармоягузории СDH, ки дар ҷазираҳои Вирҷиния сабт шудааст, ба додгоҳи ин ҷазираҳо муроҷиат кунад. РусАЛ гуфта буд, тибқи талаботи эълони варшикастагӣ додгоҳ бояд рӯйхати суратҳисобҳо ва интиқоли пулии ин ширкатро ифшо намояд.

"Озодагон" дар сурати дарёфти назари расмии мақомоти ТАЛКО, Сомон-Эйр ва дигар корхонаҳои зикршуда онро нашр хоҳад кард

Мӯҳр

Хабарҳои монанд:

Хасан

Ин гапхо дар хакикат вокеият доранд, чун, ки як чанд мох пеш Чаноби оли ба кобинааш дастур дода буд,ки ба ТАЛКО кумак кунанд! Ва агар назар андозем коргархои Барки Точикхам то 5-6 мох мохонаашонро нагирифтаанд! Ана акнун диддем, ки пулхо аз кучо ба кучо баромада мерафтаст!

Ҷавоб диҳед Иқтибос Шикоят

Ботур

Это правда 100%

Ҷавоб диҳед Иқтибос Шикоят

Said

ин барои банда чизи нав нест,барои чи? барои он,ки фарз кардем,ки мо донистем,ки пулҳои давлатиро барои тиҷоратҳои шахси истифода мебаранд баъд чи? оё ҳаст нафаре,додгоҳе,суде,прокуроре ё ҷамоате,ки иоро ҳисобот гираду ҷазо диҳад? ба андешаи ман не.

Ҷавоб диҳед Иқтибос Шикоят

Мухаммад

Ин руссиях мехахад хама иншоотхои мухим ва стратегиро дар Точикистон аз худ кунад.Аз хукумати Точикистон мехохам,ки бо шиддат муковимат кунад.

Ҷавоб диҳед Иқтибос Шикоят

Эзоҳ илова кунед