06 июн 2014 15:33Тоҷикистон / Сиёсат

Изҳороти Абдуллоҳ Абдуллоҳ баъди сӯиқасд: “Таҳдидҳо монеи мо намешаванд” (АКСУ ВИДЕО)

Доктор Абдуллоҳ Абдуллоҳ, номзади пештози интихоботи раёсати ҷумҳури Афғонистон, аз ҳамлаи интиҳории гуруҳи номаълуме, ки ҳамчун сӯиқасд ба ҷони ӯ тарҳрезӣ шуда буд, ҷон ба саломат бурдааст.

Ин ҳамлаи интиҳорӣ алайҳи номзади пештози интихоботи президентии Афғонистон рӯзи 6 дар шаҳри Кобул – пойтахти ин кишвар сурат гирифтааст. Маводи таркандаи гузошташуда дар яке аз мошинҳои корвони гуруҳи доктор Абдуллоҳ замоне мунфаҷир мешавад, ки мошини онҳо аз як ҳамоиши мардумӣ аз Кобул Ориёно ба меҳмонхонаи Интерконтинентал ҳаракат доштаанд.

Дар пайи ин ҳодиса панҷ нигаҳбони номзади пештози интихоботи президентии Афғонистон ҷароҳати вазнин бардоштаанд. Тибқи иттилои расонаҳои хабарии Афғонистон, ҷаноби Абдуллоҳ дар меҳмонхонаи “Кобул Ориёно” дар маросиме ширкат кардааст, ки Ҳизби ваҳдати миллии исломии Афғонистон аз вай пуштибонии худро эълом кард. Гуфта мешавад, ки ин рӯйдоди талафотеро дар пай дорад, аммо то кунун мақомоти қудратии афғон дар бораи шумораи дақиқи талафот чизе нагуфтаанд.

Соате пас аз ҳамла ҷаноби доктор Абдуллоҳ дар саҳифаи иҷтимоии Твиттер навиштааст, "таҳдидҳо монеи мо ва мардуми мо шуда наметавонад ва мо ба ваъдаҳои худ барои ояндаи беҳтар мутааҳҳид ҳастем". То кунун ҳеч ҳаракат ба шумули гуруҳи Толибон масъулияти ин ҳамларо бар уҳда нагирифтаанд.

Доктор Абдуллоҳ Абдуллоҳ 54 сол дошта, дар маҳаллаи Корти Парвони Кобул ба дунё омадааст. Модараш тоҷик ва падараш пашту мебошад. Соли 1984 донишгоҳи Кобулро дар риштаи тиб ба поён расонидааст. Дар ибтидо ҳамчун табиби муҷоҳиддин ифои вазифа карда, дар солҳои ҷанг бар зидди неруҳои Иттиҳоди Шӯравӣ вориди мубориза шудааст. Дар ин давра ӯ ба ҳайси сарпарасти беҳдошти Ҷабҳаи панҷшер ва баъдан ҳамчун мушовир ва ҳамкори Аҳмадшоҳи Масъуд то озодии Кобул хидмат менамояд. Вай аз соли 1993 то 1996 дар шаҳри Кобул раиси дафтар ва сухангӯи Вазорати дифои миллии Афғонистон буда, соли 1997 ба ҳайси муовини вазири умури хориҷии кишвараш баргузида мешавад. Соли 1999 раҳбарии ин ниҳодро бардӯш мегирад.

Ӯ дар интихоботи президентии 5 апрели Афғонистон дубора номзадии худро эълон карда, бо ба даст овардани 43,7 дарсади оро (овоз) миёни рақибонаш номзади пешгоми ин корзор эълон гардид. Кумисюни марказии интихоботи Афғонистон дар пайи эълони натоиҷи интихоботи президентии 5 апрели соли ҷорӣ эълон намуд, ки дар ин давра ягон номзаде натавонист, беш аз 50 дар сад раъйи мардумро ба даст орад ва аз ин рӯ, ду номзади пешсаф - доктор Абдулло Абдулло ва Ашраф Ғанӣ Аҳмадзай, ки бо соҳибии 33,8 дарсади оро дар мақоми дуюм қарор дорад, дар даври дуюми интихобот вориди рақобат мешаванд. Санаи баргузории давраи дуюми интихоботи президентии Афғонистон рӯзи 14 июн эълон шудааст.

То кунун аксар шахсиятҳои бонуфузи Афғонистон ҳимояти худро аз доктор Абдуллоҳ Абдуллоҳ дар давраи дуюми интихобот эълон кардаанд. Ахиран Аҳмад Масъуд, писари Аҳмадшоҳ Масъуди шаҳид аз тими "Ислоҳот ва ҳамгироӣ" низ ҳимояти худ аз Абдуллоро эълон карда, мардуми кулли кишварашро барои ҷонибдорӣ аз ӯ даъват намуд. Ҳамзамон Залмай Расул ва Гулоғо Шерзай, номзадҳои дигари интихоботи президентии Афғонистон низ аз пайвастани худ ба ситоди интихоботии доктор Абдулло Абдулло хабар дода буданд.