АКС: Паёми Ли Е Чин аз арзонию фаровонии семент дар Тоҷикистон

Ли Е Чин, мудири генералии ширкати Хуасини Чин, дар мулоқот бо Эмомалӣ Раҳмон, раисиҷумҳури Тоҷикистон зиёд намудани иқтидорҳои мавҷудаи сементбарорӣ ва бунёди корхонаҳои навро баррасӣ кардааст.

Тибқи иттилои дафтари матбуоти раисиҷумҳури Тоҷикистон зимни мулоқот зикр гардид, ки имрӯз, 3-юми апрел, сохтмони корхонаи дуюми ин ширкати азими чинӣ дар ноҳияи Бобоҷон Ғафуров бо иқтидори солонаи 1 миллион тонна семент ва 1000 ҷойи корӣ оғоз ёфт: “Корхонаи якуми он бо ҳамин иқтидор ва ҳамин қадар ҷойи корӣ дар ноҳияи Ёвон фаъолият дорад. Ҳардуи ин корхонаҳо бо саҳмгузории муштарак бо ширкати ватании Ғаюрсемент бунёд ёфтаанд.”

Ба иттилои манбаъ ширкатҳои Тоҷикистону Чин минбаъд тасмим доранд, ки иқтидори корхонаи Ёвонро ба 1,4 миллион тонна расонанд ва боз як корхонаи дигари семент дар ноҳияи Данғара бо иқтидори 1,5 миллион тонна бунёд намоянд: “Корхонаи Данғара низ бо харҷи 100 миллион доллари амрикоӣ бунёд меёбад ва дар он 1000 нафари дигар бо кори доимӣ таъмин хоҳанд шуд.”

Ҷонибҳо таъкид кардаанд, ки дар сурати фаъол шудани ин ду корхона истеҳсоли семент дар Тоҷикистон аз талабот барзиёд шуда, кишвар ба содиркунандаи семент табдил меёбад.

Феълан талаботи Тоҷикистон ба семент аз ҳисоби воридот аз хориҷ, аз ҷумла Покистон таъмин мегардад.

Мӯҳр