“Ғорат”-и муҳоҷирони тоҷик аз Ватан сар мешавад (АКС)

Алишер Зарифӣ

Сохторҳои Хадамоти муҳоҷирати Тоҷикистон аз муҳоҷирони эҳтимолии тоҷик барои хизматрасониҳое, ки бояд ройгон пешниҳод гарданд, маблағ меситонанд.

Аз ҷумла аз як гурӯҳ муҳоҷирони меҳнатӣ, ки дар назди даромадгоҳи Раёсати шаҳри Душанбеи Хадамоти муҳоҷирати Вазорати меҳнат ва шуғли аҳолии Тоҷикистон барои дақиқ кардани он, ки номашон дар рӯйхати депортшудагон аст ё не аз 10 то 20 сомонӣ гирифта мешуд. Дар ҳоле, ки дар пеши дари бинои ин раёсат навишта шудааст, ки гирифтани маълумот ройгон (бепул) аст.

Хабарнигори “Озодагон” низ ба сифати як муҳоҷири эҳтимолии тоҷик 18-уми март ба ин ниҳод муроҷиат кард ва як ҷавон, ки худро масъули раёсат хонд, маблағ талаб намуд.

Муроҷиаткунандагони дигар низ ба суоли “Озодагон”, ки иттилоъ дар бораи ҳаққи воридшавӣ ба Русия пулакӣ аст ё ройгон ҷавоб доданд, ки ”бепул асту, хай ягон сум метӣ да”. Яке 10 ва дигаре 20 сомонӣ барои муайян намудани номаш дар рӯйхати депортшудагон медоданд ва кӯшиш мекарданд, ки ҳар чӣ зудтар корашон ҳал шавад. Корманди Хадамот, ки дар ҳузураш муҳоҷирон дар навбат буданд, аз онҳо пул гирифта дар пушти нусхаи шиносномаашон шумораи телефонашонро менавишт. Баъди анҷоми ин кор ин масъули хадамоти муҳоҷират вориди бинои раёсат шуда, ба муҳоҷирон ваъда дод, ки “то пагоҳ дар рӯйхати депортшудагон будан ё набуданатонро муайян карда, тариқи телефон занг зада мегӯям ё худатон метавонед омада фаҳмед”.

Абдуллоҳ Қодирӣ, сухангӯи Хадамоти муҳоҷират дар суҳбат ба “Озодагон” гуфт, талабаи маблағ аз ҷониби кормандонашон барои ин намуди хизматрасонӣ ғайриқонунӣ буда, ҳар нафаре, ки ба чунин амал даст мезананд, нисбаташ чораҳо андешида мешавад: “Худи вазири меҳнат ва шуғли аҳолӣ як муовинашро барои назорати ин масъала вазифадор намудааст. Мо ин масъаларо пайгирӣ намуда, дар сурати пайдо кардани далел барои пулгирӣ аз муҳоҷирон, ҳар корманде бошад, муҷозот дода мешавад, аз вазифа озод карда мешавад”.

Бино ба иттилои Хадамоти муҳоҷират то ба ҳол беш аз 72 ҳазор нафар аз шаҳрвандони Тоҷикистон дар рӯйхатти нафароне ҳастанд, ки бо иттиҳоми қонуншиканӣ то 5 соли дигар ҳаққи ворид шудан ба Русияро надоранд.

Мӯҳр