09 мар 2014 18:04Оcиёи Марказӣ / Тоҷикистон

Раҳмон: “Фаҳим ҳамеша чун дӯсти ҷонӣ дар ёди мо хоҳад монд”

Эмомалӣ Раҳмон, раисиҷумҳури Тоҷикистон, бо ирсоли номае ба ҳамтои афғонаш -- Ҳомид Карзай даргузашти Муҳаммадқасими Фаҳимро барои кулли мардуми Афғонистон тасаллият гуфтааст. Ҷаноби Раҳмон дар номаи худ навишта, ки маршал Фаҳим дар ёди тоҷикистониён ҳамеша чун дӯсти ҷонӣ боқӣ хоҳад монд.

Раисиҷумҳури Тоҷикистон гуфтааст, “шодравон Фаҳимхон аз шахсиятҳои бузурги таърихи навини Афғонистони мубориз буд ва дар сафҳои аввали ҷиҳод ва муқовимати мардуми қаҳрамони кишвар қарор дошт. Ширкати марҳум дар раванди эҳёи муҷаддади ҳамсоякишвари мо аз саҳми боризи ӯ дар пайкори озодӣ камтар набуд. Ин аст, ки ёди поки ин марди некниҳоду нексиришт аз дилу дидаҳои ҳамаи онҳое, ки ӯро мешинохтанду аз наздик медонистанд, зудуда нахоҳад шуд.”

Ҷаноби Раҳмон дар идома афзудааст, “дар ин лаҳзаҳои сангин, ки мардуми Афғонистон талафоти ҷуброннопазире дидааст, хоҳишмандам таъзия ва тасаллияти амиқу самимии инҷониб ва мардуми дӯсти Тоҷикистонро қабул фармоед. Ба хонаводаи шарифи шодравон, ёрону ҳамсангаронаш, тамоми аҳли ҷиҳоду муқовимат ва ҳамаи мардуми бародари Афғонистон расонидани ҳамдардии мо лутфи Шумо хоҳад буд.”

“Парвардигор марҳумро ғариқаи раҳмат ва шоистаи ҷаннат гардонад. Маъвои охираташ пурнур бод!”,-таъкид шудааст дар номаи тасаллияти Эмомалӣ Раҳмон ба Ҳомид Карзай.

Сайидумар Ҳусайнӣ, муовини раиси Ҳизби наҳзати исломӣ ва вакили Маҷлиси Намояндагони Тоҷикистон, дар сӯҳбат бо "Озодагон" низ даргузашти Муҳаммадқасими Фаҳимро бохти бузурге барои тоҷикон донист. Ӯ гуфт, “агар Муҳаммадқосим зинда мебуд, ҳатман таъсири худро дар ҳар коре дошт.”

Вале оқои Ҳусайнӣ мегӯяд, маршал Фаҳим маҳбубиятеро, ки солҳои пеш дошт, дар ин авохир аз даст дода буд. “Баъд аз ташкили ҳукумати ҷадиди Афғонистон, ки ӯ дар паҳлӯи Ҳомид Карзай, раисиҷумҳури ин кишвар қарор гирифт, аз ҷумла дар интихоботи 4 соли қабл, ки дар паҳлӯи доктор Абдуллоҳ набуд, як миқдор обрӯи ӯ миёни ҷонибдоронаш поин рафтааст. Ба ҳар сурат, яке аз чеҳраҳои шинохтаву маъруфи ҷиҳодӣ оламро падруд гуфт”,-афзуд Ҳусайнӣ.

Муҳаммадқасими Фаҳим, ки 56 сол дошт, рӯзи якшанбе бар асари сактаи қалбӣ дар манзилаш даргузашт. Ҳомид Карзай, раисиҷумҳури Афғонистон, марги маршал Фаҳимро мусибати бузург хонда, дар ин робита се рӯз мотами миллӣ эълон кардааст.

Мӯҳр

Хабарҳои монанд:

К. Камарзод

"Инно лиллохи ва инно илайхи рочиъун".
Худованд рахматаш кунад, чи инсони хубе буд...

Ҷавоб диҳед Иқтибос Шикоят

Абдулло

Аллоҳ ғариқаи раҳмат ва шоистаи ҷаннаташ гардонад! Сад ҳайф, ки дар пешоруи интихоботи Президентй намояндагони ТОЧИК лидерони худро аз даст дода истодаанд.

Ҷавоб диҳед Иқтибос Шикоят

tojik

xudovand rahmatat kunad barodar.

Ҷавоб диҳед Иқтибос Шикоят

Эзоҳ илова кунед