04 фев 2014 09:39Тоҷикистон / Иқтисодӣ

Хитоиҳо миллионҳоро аз мақомоти тоҷик пинҳон кардаанд

Оҷонсии мубориза бо фасод танҳо дар моҳи аввали соли 2014-ум алайҳи 4 шаҳрванди воломақоми Чин дар Тоҷикистон парвандаи ҷиноӣ кушодааст, ки миллионҳо даромадашонро аз давлат панҳон карда, аз андоз “гурехтаанд.”

Дар қатори андозгурезҳо инчунин роҳбарияти корхонаи муштараки “Зарафшон” ном бурда, мешавад, ки 75 дарсади саҳмияҳояш моли Чин буда, калонтарин тавлидкунандаи тилло дар Тоҷикистон мебошад.

Оҷонсии мубориза зидди фасод мегӯяд, дар пайи санҷиш муайян шудааст, ки мудири кулли “Зарафшон” Ли Фен ва мудири моляивии ҷамъияти мазкур Лю Даоин, аз моҳи январи соли 2010 то июли соли 2012 бо роҳи пешниҳоди маълумоти дурӯғ аз пардохти андоз саркашӣ намудаанд: “Масъулини андоз ҳисоб кардаанд, ки андози пардохтнашудаи ин корхона 3 миллиону 366 ҳазор сомониро ташкил додааст, ки он бо назардошти муҷозоти молиявӣ 3 миллиону 950 ҳазорро ташкил медиҳад.”

Манбаъ таъкид мекунад, ки феълан алайҳи Ли Фен ва Лю Даоин парвандаи ҷиноӣ оғоз шуда, тафтишоти пешакӣ идома дорад.

Ин дар ҳолест, ки ба иттилои Оҷонсии зидди фасод пинҳон кардани даромад дар корхонаи дигар, “Ширкати саноати куҳии Тоҷикистону Чин” ба маротиб бештарро ташкил медиҳад.

Ба иттилои ин ниҳод мудири “Ширкати саноати куҳии Тоҷикистону Чин”, Чен Ин Сян ва сармуҳосиби ҷамъияти мазкур Ло Цзян Хуа аз 1 январи соли 2010 то июли соли 2012 бо роҳи ба эъломияҳои андоз дохил намудани маълумоти таҳрифшуда, аз пардохти андоз ба миқдори махсусан калон саркашӣ намудаанд: “Масъулини андоз ҳисоб кардаанд, ки дар замони фаъолият ин ширкат дар ҳаҷми 13 миллиону 182 ҳазор сомониро пардохт накардааст, ки бо дарназардошти муҷозоти молиявӣ маблағи 17 миллиону 431 ҳазор сомониро ташкил медиҳад.”

Ин ниҳод афзуд, ки алайҳи Чен Ин Сян ва Ло Цзян Хуа парвандаи ҷиноятӣ оғоз карда шуда, тафтишоти пешакӣ идома дорад.

Мӯҳр

Хабарҳои монанд: